Քրդական «Ժողովրդավարական Սիրիայի ուժերի» (SDS) հրամանատարությունը դատապարտում է թուրքական օդուժի հարձակումները երկրի հյուսիսային շրջանների բնակավայրերի վրա, որոնց զոհ են դարձել տասնյակ խաղաղ բնակիչներ։
Այս մասին ասվում է SDS-ի հայտարարության մեջ, որը կիրակի օրը հեռարձակել է Al-Hadath հեռուստաալիքը։
«Քուրդ մարտիկներն անպատասխան չեն թողնի այս ագրեսիվ հարձակումը և կհարվածեն թուրքական զորքերին ճիշտ տեղում, ճիշտ ժամանակին»,- ասվում է փաստաթղթում։
Դրանում նշվում է, որ ռմբակոծվել է Այն ալ Արաբ քաղաքի պատմական կենտրոնը (քրդական անվանումը՝ Քոբանի), որը գտնվում է Հալեպի նահանգային կենտրոնից 150 կմ հյուսիս-արևելք։ Բացի այդ, ավերածությունների ու զոհերի մասին տեղեկություն է ստացվել Հասաքա նահանգի հյուսիսում գտնվող սահմանամերձ Ալ-Մալիքիա քաղաքից։
SDS հրամանատարությունը կոչ է անում միջազգային հանրությանը «ուշադրություն դարձնել թուրքական զորքերի բարբարոսական գործողություններին և դրանց հետևանքներին խաղաղ բնակչության համար»։
Իր հերթին, SDF-ի հրամանատար Մազլում Աբդին Ronahi հեռուստաալիքին ասել է, որ Թուրքիան նախօրոք ծրագրել է զանգվածային ռմբակոծություններ Սիրիայի հյուսիսում քրդական կազմավորումների կողմից վերահսկվող տարածքների ուղղությամբ: Նա պնդել է, որ «նոյեմբերի 13-ին Ստամբուլում տեղի ունեցած ահաբեկչությունն օգտագործվել է որպես զինված գործողության պատրվակ»։
Ավելի վաղ Թուրքիայի պաշտպանության նախարարությունը հայտնել էր, որ կիրակի գիշերը իրականացված օդային հարձակման արդյունքում Հյուսիսային Իրաքում և Սիրիայում ոչնչացվել է 89 թիրախ։ Պաշտպանության նախարարության տվյալներով՝ հարվածները հասցվել են Թուրքիայում արգելված Քրդստանի աշխատավորական կուսակցության (PKK) բազաներին և սիրիացի քրդերի կազմավորումներին։ Ցամաքային օդային աջակցությունը տրամադրվել է հրետանու միջոցով։
