ՆԱՏՕ-ի Խորհրդարանական վեհաժողովը բանաձեւ է ընդունել, որում կոչ է անում ստեղծել Ռուսաստանի ագրեսիայի դեմ հատուկ միջազգային տրիբունալ եւ ճանաչել Ռուսաստանը որպես ահաբեկչական պետություն։ Այս մասին հայտարարել է ՆԱՏՕ-ի Խորհրդարանական վեհաժողովում Ուկրաինայի մշտական պատվիրակության ղեկավար Եգոր Չերնևը։
Ուկրաինական կողմի առաջարկները, նրա խոսքով, պաշտպանվել են ՆԱՏՕ-ի անդամ բոլոր 30 երկրների կողմից։
Եգոր Չերնևն ասել է, որ փաստաթղթում Խորհրդարանական վեհաժողովը նաև հաշվի է առել Ուկրաինայի առաջարկները՝ ավելացնելու զենքի մատակարարումները, կոնկրետ քայլեր մշակել Ուկրաինայի՝ ՆԱՏՕ-ին անդամակցելու և Ուկրաինային հասցված վնասի համար Ռուսաստանից փոխհատուցումների հավաքագրման մեխանիզմ ստեղծելու համար։
«Այս բանաձեւի ընդունումը կարեւոր քաղաքական քայլ է, որն արտացոլում է արեւմտյան խորհրդարանական շրջանակների տրամադրությունները եւ, հետեւաբար, ազդում է երկրի ղեկավարության վրա որոշումների կայացման գործընթացում»,- ասել է նա։
ՄԱԿ-ի Գլխավոր ասամբլեան ավելի վաղ ընդունել էր բանաձեւ, որում Ռուսաստանը ճանաչվում է որպես պատասխանատու Ուկրաինային փոխհատուցում վճարելու համար։ Փաստաթղթին աջակցել են վեհաժողովի 193 անդամներից 94-ը։ Դեմ են քվեարկել 14 երկրներ, այդ թվում՝ Ռուսաստանը, Բելառուսը, Չինաստանը, Կուբան, Իրանը և Զիմբաբվեն։ Ձեռնպահ են մնացել 73 երկրներ, այդ թվում՝ Ղազախստանը, Սերբիան, Բրազիլիան և Հնդկաստանը։
Բանաձեւով առաջարկվում է ստեղծել միջազգային մեխանիզմ՝ արձանագրելու եւ փոխհատուցելու այն վնասները, որոնք Ուկրաինան կրել եւ կրելու է ռուսական լայնամասշտաբ ներխուժման արդյունքում։
Աղբյուրը՝ currenttime.tv
Թարգմանեց՝ Աստղ Խաչատրյանը
