Ատոմային էներգիայի միջազգային գործակալության (ՄԱԳԱՏԷ) փորձագետները հրետակոծությունից հետո Զապորոժյեի ատոմակայանի ստուգման ժամանակ հայտնաբերել են ոչ ռադիոակտիվ արտահոսք՝ կոնդենսատների պահեստավորման վնասման պատճառով։ Այս մասին ասվում է գործակալության ղեկավար Ռաֆայել Գրոսսիի հայտարարության մեջ։
Հարվածները վնասել են նաև հիմնական ճանապարհը, որն անցնում է ռեակտորների երկայնքով, չգործող երկաթուղին, սեղմված օդի խողովակաշարը և օժանդակ շենքերի տանիքները։
Ատոմակայանի բոլոր վեց ռեակտորները գտնվում են կայուն վիճակում, հարվածների ժամանակ միջուկային վառելիքի և թափոնների պահեստարանները չեն տուժել, նշում են փորձագետները։ Միջուկային անվտանգությանն անմիջական սպառնալիք չկա, ասվում է հայտարարության մեջ։
Գրոսսին նաև նշել է վերջին հարձակումների ինտենսիվությունը և ասել, որ այս ֆոնին կվերսկսի խորհրդակցությունները կայարանի շուրջ անվտանգության գոտու վերաբերյալ։
Ռուսական զորքերը Զապորոժիայի ատոմակայանը գրավեցին 2022 թվականի մարտին՝ Ուկրաինա ներխուժումից անմիջապես հետո։ Այդ ժամանակից ի վեր Ռուսաստանն ու Ուկրաինան բազմիցս միմյանց մեղադրել են կայանի հրթիռակոծման մեջ: Վերջին անգամ ատոմակայանի տարածքը գնդակոծվել է նոյեմբերի 19-20-ին։
Նոյեմբերին ՄԱԳԱՏԷ-ն բանաձեւ էր ընդունել, որով Ռուսաստանին կոչ էր անում դուրս բերել իր զինվորականներին եւ այլ անձնակազմին Զապորոժյեի ատոմակայանից։
Աղբյուրը՝ Meduza.io
Թարգմանեց՝ Աստղ Խաչատրյանը
