ԿՀՎ-ն պատրաստվում է հավաքագրել ռուսների, ովքեր համաձայն չեն Ուկրաինա ներխուժման հետ

ԿՀՎ հետախուզության ղեկավար Դեյվիդ Մարլոուն ասել է, որ գործակալությունը մտադիր է համագործակցել ռուսների հետ, ովքեր դեմ են Ուկրաինայի պատերազմին։ Այս մասին հայտնում է The Wall Street Journal-ը՝ վկայակոչելով հետախուզական ծառայության ղեկավարի ելույթի ձայնագրությունը։

«Պուտինն իր գագաթնակետին էր ներխուժումից մեկ օր առաջ», – ասել է Մարլոուն Հայդեն կենտրոնում ելույթի ժամանակ: Նա բացատրել է, որ մինչ պատերազմի սկսվելը ՌԴ նախագահը կարող էր ազդել Ուկրաինայի ու ՆԱՏՕ-ի վրա՝ խոսելով իր երկրի հզորության մասին։ «Բայց նա կորցրեց ամեն ինչ», – ավելացրեց հետախուզության ղեկավարը:

«Մենք ամբողջ աշխարհում փնտրում ենք ռուսների, ովքեր նույնքան զզվում են դրանից (Ուկրաինայի պատերազմից), որքան մենք… Մենք բաց ենք համագործակցության համար», – ընդգծել է Մարլոուն:

The Wall Street Journal-ը նշում է, որ հետախուզության ղեկավարի հայտարարությունը արձագանքն է գործակալության նախկին աշխատակիցների հայտարարությունների, որոնք պնդում էին, որ ռուսական ներխուժումն Ուկրաինա պարարտ հող է ստեղծել նոր գործակալներ զինվորականների, օլիգարխների, գործարարների և բոլոր նրանց հավաքագրման, ովքեր լքել են Ռուսաստանը պատերազմի սկսվելուց հետո:

Ուկրաինայում պատերազմի սկսվելուց հետո Ռուսաստանը և արևմտյան երկրները փոխադարձաբար արտաքսեցին հարյուրավոր դիվանագետների։ ՌԲԿ-ի գնահատականներով՝ 2022 թվականի հունվարից օգոստոս ամիսներին Ռուսաստան են վերադարձվել դիվանագիտական ​​առաքելությունների ավելի քան 550 աշխատակիցներ, որոնցից մի քանիսը կասկածվում էին լրտեսության մեջ։ Ռուս դիվանագետների մեծ մասը արտաքսվել է ԱՄՆ-ից, Բուլղարիայից և Լեհաստանից։ Ի պատասխան՝ Ռուսաստանը վտարել է ավելի քան 300 մարդու։

Աղբյուրը՝ Meduza.io