Շվեդիայի պետական անվտանգության ծառայությունը (SÄPO) ձերբակալել է երկրի երկու բնակչի՝ լրտեսության կասկածանքով։ Այս մասին հայտնում է գերատեսչության կայքը։
Ձերբակալվածներից մեկը, ըստ SÄPO-ի զեկույցի, կասկածվում է Շվեդիայի և մեկ այլ օտարերկրյա պետության դեմ անօրինական հետախուզական գործունեության մեջ, որը չի նշվում: Երկրորդ ձերբակալվածը կասկածվում է օժանդակելու մեջ։
Dagens Nyheter թերթը մանրամասնում է, որ ենթադրյալ լրտեսները նոյեմբերի 22-ի առավոտյան բերման են ենթարկվել Ստոկհոլմի արվարձաններում։ Գործողությանը մասնակցել է երկու ուղղաթիռ։ Կասկածյալների տունը խուզարկվել է. Ստոկհոլմի շրջանային դատարանի տվյալներով՝ ձերբակալվածները լրտեսությամբ զբաղվել են 2013 թվականից։
Իր հերթին Aftonbladet հրատարակությունը պնդում է, որ ձերբակալվածները Ռուսաստանից արտագաղթած ամուսնական զույգ են։ Dossier Center-ը և Expressen-ը հայտնում են, որ նրանք 59-ամյա Սերգեյ Սկվորցովն ու 58-ամյա Ելենա Կուլկովան են, ովքեր 1997 թվականից բնակվում են Շվեդիայում և Ռուսաստանի քաղաքացիությունից բացի, ստացել են նաև Շվեդիայի քաղաքացիություն։
Ամուսինները կրթություն են ստացել էլեկտրոնիկայի և տեխնիկայի ոլորտում։ Ըստ Dossier-ի և Expressen-ի՝ Սկվորցովը նաև եղել է BDT Stockholm AB-ի տնօրենը, որը մասնագիտացած է էլեկտրոնային բաղադրիչների արտադրության և մատակարարման մեջ, այդ թվում՝ Ռուսաստան:
«Դատելով ընկերության պրոֆիլից և ամուսինների կրթությունից՝ կարելի է ենթադրել, որ նրանց գործունեությունը կապված է ԳՀՎ-ի (Գլխավոր հետախուզական վարչություն) էլեկտրոնային հետախուզության հետ։ Ինչպես գիտեք, գերատեսչությունն ակտիվորեն զբաղվում է տեխնիկական լրտեսությամբ»,- նշում են Դոսյե կենտրոնում։
Աղբյուրը՝ Meduza.io
