Գյումրիում գտնվող ՌԴ հյուպատոսարանի շենքի դիմաց այսօր Խծաբերդում գերեվարված շիրակցի զինվորականների ծնողներն ու հարազատները ակցիա են իրականացրել:
Ակցիան կազմակերպվել է այսօր ՌԴ նախագահ Վլադիմիր Պուտինի Հայաստան այցին զուգահեռ: Գերեվարվածների ծնողները Վլադիմիր Պուտինից պահանջում են անհապաղ վերադարձնել իրենց որդիներին, տեր կանգնել եռակողմ հայտարարության բոլոր կետերի կատարմանը։
«Ոչ թե խնդրում ենք, այլ պահանջում Պուտինից և Հայաստանի իշխանություններից վերադարձնել մեր որդիներին։ Պուտինը եթե ուզի, մեր տղաները շատ արագ կհասնեն տուն»,- ասել է ծնողներից մեկը։
Գերիների հարազատների խոսքով՝ բազմիցս բողոքի ակցիաներ են անցկացրել ՀՀ-ում Ռուսաստանի Դաշնության դեսպանատան դիմաց, սակայն, ըստ նրանց, ոչ ոք իրենց հստակ պատասխան չի տվել։ Վերջին հույսը, գերեվարված անձանց հարազատների խոսքով, Վլադիմիր Պուտինի և Նիկոլ Փաշինյանի հանդիպումն է։
Հիշեցնենք՝ Ռուսաստանի Դաշնության նախագահ Վլադիմիր Պուտինը ժամանել է Հայաստան։ Նա կմասնակցի Երևանում կայանալիք Հավաքական անվտանգության պայմանագրի կազմակերպության Հավաքական անվտանգության խորհրդի (ՀԱԽ) նստաշրջանին։
Աղբյուր՝ Հայկական ժամանակ
