Հայաստանում կստեղծվի ներքին գործերի նախարարություն. ՀՀ կառավարությունը հավանություն տվեց «Կառավարության կառուցվածքի և գործունեության մասին» օրենքում փոփոխությունների նախագծին։
ՀՀ արդարադատության նախարարի պաշտոնակատար Գրիգոր Մինասյանը տեղեկացրեց, որ նոր նախարարության ստեղծումը թույլ կտա ոստիկանության ոլորտի նկատմամբ թե՛ խորհրդարանական, թե՛ քաղաքացիական վերահսկողություն.
«ՆԳՆ-ն իր մեջ ներառելու է երեք խոշոր ծառայություն՝ ոստիկանությունը, փրկարար ծառայությունը և միգրացիայի ու քաղաքացիության ծառայությունը»։
Մինասյանի տեղեկացմամբ՝ նախարարությունում կկենտրոնացվի ֆունկցիոնալ 5 հիմնական ոլորտ՝ հասարակական կարգի պահպանություն, հանցագործությունների կանխում և բացահայտում, աղետների ռիսկի կառավարում, միգրացիա և քաղաքացիություն, պետական ռեզերվների կառավարում և հումանիտար հարցեր։
ՀՀ վարչապետ Նիկոլ Փաշինյանն էլ վստահեցրեց, որ կունենանք նոր ստանդարտի ոստիկանություն և փրկարար ծառայություն, կբարձրանա աշխատանքի արդյունավետությունը։
