Երևանի փոխքաղաքապետ Տիգրան Ավինյանը մասնակցել է կանանց դեմ ուղղված բռնության վերացման միջազգային օրվան նվիրված պանելային քննարկմանը։
Ավինյանը կարևորել է պետության դեմ կանանց դեմ բռնությունը կանխելու հարցում։ Նրա խոսքով. «Պետությունը կանանց բռնության հարցում ունի շատ մեծ պարտավորություն: Պետք է կամք դրսևորել օրենսդրական դաշտում, սակայն պետք է հասկանալ, որ շատ հարցեր հենց հասարակության ներսում են պարփակված՝ քողարկված ավանդապաշտության կեղծ օրակարգերով»։
Ավինյանը նշել է, որ հայ ժողովրդի ավանդույթների մեջ երբեք չի եղել կնոջ նկատմամբ բռնություն. «Դա մտացածին է, դա չի կարող լինել իրականություն մի ժողովրդի համար, որը 20-րդ դարի սկզբում ընդունել է, որ կանայք նույնպես ունեն ընտրության իրավունք, երբ երկրների մեծամասնությունում կանայք ընտրական իրավունք չունեին»։
Նա խոսել է սեռով պայմանավորված հղիության արհեստական ընդհատման մասին, այն որակելով որպես բռնության դրսևորում։ Ըստ Ավինյանի՝ սա ժողովրդագրական սուր խնդիր է. «Ամեն հինգերորդ երեխան չի ծնվում՝ պայմանավորված երեխայի սեռով։ Մենք զարհուրելի ցուցանիշ ունենք աշխարհում՝ այլ երկրների համեմատ։ Մեկ կամ երկու երկիր կարող են այս հարցում մեզանից անցնել»։ Ավինյանը նաև տեղեկացրել է, որ ինքը երեք աղջիկների հայր է։
