ԵԱՀԿ-ում ԱՄՆ ներկայացուցիչ, դեսպան Մայքլ Քարփենթերը անդրադարձել է հայ-ադրբեջանական հարաբերություններին, խաղաղության բանակցություններին և դրանում ԱՄՆ ներգրավվածությանն ու դերին։
Պատասխանելով հարցին, թե հիմա ինչ է մտադիր անել ԱՄՆ-ն, երբ Ադրբեջանը մերժել է Մակրոնի միջնորդությունն ու եվրոպական ֆորմատը, Քարփենթերը պատասխանել է.
«Միացյալ Նահանգները ակտիվ ու շատ խորը ներգրավված է այս գործընթացում և շատ է շահագրգռված խաղաղության համաձայնագրի ապահովման մեջ։ Մենք կշարունակենք ուղիներ փնտրել առաջնորդներին միավորելու համար: Գաղտնիք չէ, որ այս հարցում մենք սերտորեն աշխատում ենք ԵՄ-ի մեր գործընկերների հետ և նաև դիտարկում ԵԱՀԿ դիտորդների տեղակայումը հայ-ադրբեջանական սահմանի հայկական կողմում. մասնավորապես, այնտեղ տեղակայվեց կարիքների գնահատման թիմ։
Մենք մեծապես աջակցում ենք ԵՄ ջանքերին: Մեր նպատակը պարզ է։ Մենք, որքան հնարավոր է՝ շուտ, կցանկանայինք տեսնել սահմանազատված սահման և երկու կողմերի միջև խաղաղության համաձայնագիր, որպեսզի խաղաղությունն ու կայունությունը վերադառնան տարածաշրջան, հարգվեն մարդու իրավունքները և տարածաշրջանում ապրողների անվտանգությունը, և մենք կարողանանք նոր էջ բացել Հարավային Կովկասի պատմության մեջ։ Ակնհայտ է, որ այդ վերջնական վիճակին հասնելու համար որոշ ժամանակ կպահանջվի, բայց մենք պարտավորվում ենք անել ամեն ինչ՝ աջակցելու այդ արդյունքին»։
