ՆԱՏՕ-ի անդամ երկրները որոշել են նվազեցնել իրենց կախվածությունը Չինաստանից և այլ «ավտորիտար ռեժիմներից»։ Այդ մասին չորեքշաբթի օրը հայտարարել է ՆԱՏՕ-ի գլխավոր քարտուղար Յենս Ստոլտենբերգը Բուխարեստում դաշինքի արտգործնախարարների հանդիպման արդյունքներով կայացած մամուլի ասուլիսում։
«Այսօր նախարարները վերանայեցին Չինաստանի հավակնոտ ռազմական զարգացումը, նրա տեխնոլոգիական առաջընթացը և աճող հիբրիդային և կիբեր գործունեությունը», – ասաց Ստոլտենբերգը: «ՆԱՏՕ-ն Եվրոպայի և Հյուսիսային Ամերիկայի դաշինքն է, բայց մեր առջև ծառացած մարտահրավերները համաշխարհային են: Մենք Չինաստանին որպես հակառակորդ չենք համարում, մենք մտադիր ենք շարունակել համագործակցել Չինաստանի հետ այն ոլորտներում, որտեղ դա համապատասխանում է մեր շահերին»,- ասել է գլխավոր քարտուղարը։
Նրա խոսքով, Ուկրաինայի հակամարտությունը «պետք է հանգեցնի ՆԱՏՕ-ի կախվածության վերագնահատմանը ավտորիտար ռեժիմներից, հատկապես Չինաստանից, մատակարարման շղթաների, տեխնոլոգիաների և ենթակառուցվածքների առումով»: «Իհարկե, մենք կշարունակենք առևտուրը և տնտեսական համագործակցությունը Չինաստանի հետ, բայց մենք պետք է տեղյակ լինենք մեր կախվածությունների մասին, նվազեցնենք մեր խոցելիությունը և կառավարենք ռիսկերը», – ընդգծել է Ստոլտենբերգը։
