ՀՀ աշխատանքի և սոցիալական հարցերի նախարար Նարեկ Մկրտչյանը ներկայացրել է Հայաստանում գործազրկության ցուցանիշները։
Նա տեղեկացրել է, որ այս պահի դրությամբ կա 3260 թափուր աշխատատեղ. «Կա նաև 50.400 գրանցված գործազուրկ, որը 2021թ. համեմատ նվազել է 8000-ով»:
ՀՀ վարչապետ Նիկոլ Փաշինյանն էլ խոսել է Հայաստանում աղքատության ցուցանիշների մասին. «Պիտի արձանագրեմ, որ 2021 թվականին Հայաստանում աղքատությունը կազմել է 26,5 %, ընդ որում, եթե մենք համեմատում ենք 2020 թվականի հետ, ունենք աղքատության որոշակի նվազում, իսկ 2019-ի նկատմամբ՝ 0,1 % կետով ունենք աղքատության ավելացում»:
Վարչապետը խոսել է նաև ծայրահեղ աղքատության ցուցանիշների մասին. «2019թ. համեմատ առկա է ծայրահեղ աղքատության 0.1% աճ, իսկ 2020թ. նկատմամբ` 0.8%»: Ըստ Փաշինյանի՝ ավելի վաղ հրապարակված ցուցանիշները համեմատելի չեն, քանի որ 2019-ից փոխվել է հաշվարկի մեթոդաբանությունը.
«Այս ցուցանիշը ցույց է տալիս, որ 2020 թվականին քովիդի հակաճգնաժամային մեր միջոցառումները եղել են խիստ հասցեական: Դրանց արդյունքում ծայրահեղ աղքատությունը կիսով չափ կրճատել ենք, բայց քանի որ հակաճգնաժամային ծրագրերն ավարտվել են, մի փոքր ավելացել է»,- ասաց Փաշինյանը:
Նա նաև նշեց. «Ցավոք, մենք աղքատության ցուցանիշների վերաբերյալ ավելի օպերատիվ տվյալներ չունենք, չենք ունենում ու ինձ հավաստիացրել են, որ դա միջազգային ստանդարտ է, ոչ մի երկրում տվյալ տարվա օպերատիվ տվյալները չեն ունենում։ Ամեն դեպքում, ես համապատասխան հանձնարարականը տվել եմ, որ մենք մեր աղքատության կառուցվածքը պետք է խորը վերլուծենք ու աղքատության հաղթահարման ռազմավարութունը մշակենք մեր գաղափարաբանության շրջանակներում, իսկ գաղափարաբանությունը հետևյալն է՝ աղքատությունը հնարավոր է հաղթահարել միայն աշխատանքի միջոցով, այլ տարբերակ չկա»։
