Այսօր Ազգային ժողովում իր ելույթում «Քաղաքացիական պայմանագիր» խմբակցության պատգամավոր Խաչատուր Սուքիասյանը, երբ քննարկվում էր կառավարության ներկայացրած՝ եկամուտների համընդհանուր հայտարարագրման համակարգի ներդրման նախագիծը, երկու հարցի անդրադարձավ:
Նախ խոսելով սրճարաններում ծխելու խնդրին՝ նա ասաց, որ թեև մարտ ամսից արգելված է, սակայն տեսնում ենք, որ ոչ բոլոր դեպքերում է այդ կարգը պահպանվում, և շատերը ծխում են: «Իսկ ինչ կլիներ, որ 30 տոկոսը թույլ տայինք՝ մարդիկ ծխեին, եկամուտներ գային և այդ եկամուտներն էլ ուղղվեին առողջապահական խնդիրներին: Չենք արել, ու դուք ինքներդ 6-7 ամսվա մեջ համոզվեցիք, որ տեղեր կան, որ օրենքը խախտվում է»,- ասաց նա և նկատեց, որ հիմա նոր ռեսուրս պետք է ծախսեն, որ ոստիկանությունը գնա և վերահսկի:
Անդրադառնալով հայտարարագրման համակարգին՝ պատգամավորն ասաց, որ թեև շատ ողջունելի է հայտարարագրման համակարգի ներդրումը, բայց գույքից եկած եկամուտի հետ կապված խնդիր ունենք: «Այդ մարդը, որ ուզենա ծախսերը ցույց տա, այդ ինստիտուցիոնալ ծախսերը ցույց տալու մեխանիզմը տվե՞լ եք իրենց: Դուք որ ասում եք՝ տասը տոկոս, տասը տոկոս չի, եթե մարդ իր գույքը հանձնում է, ուրեմն պետք է վերանորոգի, մեծ ծախսեր իրականացնի, այդ ծախսը, որ բաժանենք տարվա կտրվածքով, կտեսնենք, որ տասը չի, նա էլ է 20 տոկոս վճարում»,- ասաց նա:
