Գործող կարգավորումներով ֆիզիկական անձանց և կազմակերպությունների համար անշարժ գույքի հարկի հաշվարկման ժամանակաշրջան սահմանված է մեկ տարին:
Հարկային օրենսգրքում նախատեսվող փոփոխություններով առաջարկվում է իրավաբանական անձանց համար անշարժ գույքի հարկի հաշվարկման համար հաշվետու ժամանակաշրջան համարել յուրաքանչյուր հաշվետու կիսամյակը:
Իրավաբանական անձինք անշարժ գույքի հարկ կմուծեն տարին երկու անգամ՝ հունիսի 1-ին և դեկտեմբերի 1-ին: Ֆիզիկական անձանց մասով որևէ փոփոխություն չի նախատեսվում. նրանց համար անշարժ գույքի հարկի հաշվարկման համար հաշվետու ժամանակաշրջան է համարվում յուրաքանչյուր հաշվետու տարին:
ԱԺ դեկտեմբերի 6-ի նիստում Հարկային օրենսգրքում առաջարկվող փոփոխությունները ներկայացնելով՝ ՀՀ տարածքային կառավարման և ենթակառուցվածքների նախարարի տեղակալ Վաչե Տերտերյանը նշել է, որ նպատակն է որոշակիորեն համաչափ դարձնել անշարժ գույքի հավաքագրման տեմպը: Ըստ նրա՝ իրավաբանական անձանց գույքային պարտավորությունների կատարումը կիսամյակային դարձնելով՝ որոշակի համաչափություն կապահովվի, ինչը համայնքներին թույլ կտա եկամուտները պլանավորել ավելի հարթ, իսկ դրանցից բխող ծախսերը ևս իրականացնել այդ ընթացակարգով:
