ԱԺ պաշտպանության հարցերի մշտական հանձնաժողովի նախագահ Անդրանիկ Քոչարյանն անդրադարձել է ադրբեջանցի «բնապահպան» ակտիվիստների՝ վերջին շրջանում իրականացրած գործողություններին։

Նրա խոսքով՝ Ադրբեջանի իշխանություններն իրականացնում են լավ պլանավորված պրովոկացիոն գործողություններ՝ լարվածություն ստեղծելով Արցախում. «Բնականաբար, նրանց ակնկալիքն այն է, որ այդ լարվածությունը տեղափոխվի նաև Հայաստան։ Կարծում եմ՝ պետք է լինել սառնասիրտ, իրենց ցանկություններն իրենց ցանկություններն են, մեր նպատակները մնում են նույնը. անվտանգ կյանք Արցախի մեր հայրենակիցների համար և անվտանգության միջավայրի կառուցում՝ Հայաստանի և Արցախի միասնական անվտանգության տարածքում»։

Անդրանիկ Քոչարյանի խոսքով՝ Ադրբեջանը պետք է մի բան իմանա, որ նման քայլերով ստիպում է, որ Արցախը և Հայաստանն իրենց անվտանգության միջավայրը դարձնեն ավելի գերակա. «Նրանք ստիպում են, որ մեր անհաջողություններից դասեր քաղելու գործընթացը լինի շատ ավելի արագ քայլերով»։