Ստաս Նամինն ընտանիքի հետ ՀՀ քաղաքացիություն է ստացել և բնակարան ձեռք բերել

Այս տարի հայտնի մշակութային գործիչ, երաժիշտ, կոմպոզիտոր, նկարիչ, պրոդյուսեր, թատրոնի և կինոյի ռեժիսոր Ստաս Նամինը (իրական անունը` Անաստաս Միկոյան) ընտանիքի հետ ՀՀ քաղաքացիություն է ստացել և արդեն բնակարան ձեռք բերել մեր երկրում: Այդ մասին տեղեկանում ենք nv.am-ին երաժշտի  տված հարցազրույցից:

Լրագրողի հարցին, թե հնարավո՞ր է ենթադրել, որ համաշխարհային կատակլիզմներն ինչ-որ կերպ խթանում են հայրենակիցների հոսքը դեպի հայրենի երկիր, երաժիշտը պատասխանել է. «Որոշակի չափով, հավանաբար, դա այդպես է։ Եվ ոչ միայն հայերը, այս տարի այստեղ ավելի քան 200 հազար ռուս է եկել, առաջադեմ երիտասարդներ, որոնց թիվը Մոսկվայում այնքան էլ շատ չէ։ Ամենագունեղ, ամենաառաջադեմ ստեղծագործ երիտասարդությունը։ Եվ սա, իհարկե, Մոսկվայի և ընդհանուր առմամբ Ռուսաստանի բացթողումն է…»։

Նա նշել է, որ նրանք այստեղ իրենց շատ հարմարավետ են զգում, քանի որ «Հայաստանում մարդիկ իսկապես շատ բարի են և հյուրընկալ»։

«Աշխարհը փոխվում է և, ցավոք, ոչ դեպի լավը: Ինձ թվում է՝ այն արագորեն ցած է գլորվում։ Ի դեպ, սա իմ Centuria S-Quark սիմֆոնիայի թեման է»,- ասել է նա։