Միջանցքի՝ փակ լինելու հետևանքով՝ երեք հիվանդ՝ «Վիճակ հիպոֆիզի մակրո-ադենոմայի հեռացումից հետո, ակրո-մեգալիա, դիֆուզ խպիպ», «Վիճակ լյարդի փոխպատվաստումից և քիմիոթերապիայից հետո» և «Վահանաձև գեղձի պապիլյար կարցինոմա» ախտորոշումներով, օրեր շարունակ գտնվում էին Հանրապետական բժշկական կենտրոնի բժիշկների հսկողության տակ՝ չունենալով հայաստանյան բուժհիմնարկներ տեղափոխվելու հնարավորություն:
Արցախի ԱՆ-ից NEWS.am-ին հայտնել են, որ Կարմիր Խաչի միջազգային կոմիտեի միջնորդությամբ և ուղեկցությամբ նրանք այսօր տեղափոխվել են Հայաստանի տարբեր մասնագիտացված բժշկական կենտրոններ։
Ծնողներից մեկը պատմել է, որ երեխայի մոտ ուռուցք է հայտնաբերվել, Երեւանում բուժում է ստացել, հետո մեկնել Գերմանիա բուժման, հիմա նորից մեկնում են Գերմանիա։
Հիշեցնենք, որ Արցախի բուժհաստատություններում դադարեցված են պլանային վիրահատությունները։ «Արևիկ» բուժմիավորումում 11 երեխա գտնվում է նորածնային և վերակենդանացման բաժանմունքներում:
Հանրապետական բժշկական կենտրոնում 9 բուժառու գտնվում է վերակենդանացման բաժանմունքում, նրանցից 4-ը ծայրահեղ ծանր վիճակում: Մինչ այսօր Կարմիր Խաչի միջազգային կոմիտեի միջնորդությամբ և ուղեկցությամբ Արցախից Հայաստան է տեղափոխվել 16 հիվանդ։
