Այսօր մենք կարծում ենք այլ ճանապարհներ տեղին չէ կիրառել, քանի դեռ հնարավոր խաղաղության և երկխոսության ճանապարհն ամբողջովին սպառված չէ, քանի դեռ ամեն ինչ չենք փորձել։
Այս մասին այսօր՝ հունվարի 13-ին, Երեւանում ՀՀ ԱԺ նախագահ Ալեն Սիմոնյանի հետ ասուլիսի ընթացքում ասաց Ֆրանսիայի ԱԺ նախագահ Յաել Բրաուն-Պիվեն՝ պատասխանելով հարցին, թե ինչու պաշտոնական Փարիզը քաղաքական հայտարարություններից զատ պատժամիջոցներ չի կիրառում ագրեսոր Ալիևի նկատմամբ, որի գործողությունների հետևանքով զոհվում են խաղաղ բնակիչներ, գրավվում են Հայաստանի ինքնիշխան տարածքները, իսկ արդեն մեկ ամիս է ՝ փակ է արցախցիների համար ճանապարհը։
«Այսօր մենք կարծում ենք, որ ամենից շատ կարևոր է խաղաղ կարգավորումը և երկխոսության վերականգնումը և մեր և հանրապետության նախագահի բոլոր ջանքերն ուղղված են դրան։ Մեր էներգիան 100 տոկոսով դեպի այդ կարգավորմանն է ուղղված»,- նշեց Ֆրանսիայի ԱԺ նախագահը։
Յաել Բրաուն-Պիվենի խոսքով, Ֆրանսիան ակտիվ է, չի սահմանափակվում միայն հայտարարություններով․
«Կարծում եմ, որ սա ճիշտ ճանապարհն է, ամեն դեպքում այն ճանապարհն է, որ մենք ենք ընտրել, միջնորդության դերը, հնարավորինս ակտիվ միջնորդության, բնականաբար, ու նաև աջակցության ամենաաներկբա աջակցության ճանապարհը, որն այսօր ևս արտահայտվում է իմ ներկայությամբ Հայաստանում»։
16:53
Մայիս 4, 2026
