2023 թվականի սեպտեմբերին Բելառուսի տարածքում կանցկացվեն ՀԱՊԿ արագ արձագանքման հավաքական ուժերի, հետախուզական և թիկունքային ստորաբաժանումների վարժանքներ։
Այդ մասին ասել է Բելառուսի ԱԽ պետքարտուղարի առաջին տեղակալ Պավել Մուրավեյկոն։
«Ռազմական գծով. կազմակերպության կողմից անցկացվող ամենամյա չորս վարժանքներից երեքը նախատեսվում է անցկացնել մեր երկրի տարածքում»,-ասել է պաշտոնյան։
Հիշեցնենք, որ հունվարի 10-ին հրավիրած մամուլի ասուլիսի ժամանակ ՀՀ վարչապետ Նիկոլ Փաշինյանը հայտարարեց, թե այս տարի Հայաստանում ՀԱՊԿ զորավարժություններ չեն կայանա, քանի որ, ըստ նրա, Երևանը ներկա իրավիճակում դա նպատակահարմար չի համարում։
Նրա խոսքով, ՀՀ պաշտպանության նախարարությունն արդեն ծանուցել է ՀԱՊԿ-ին այդ մասին։
Ի պատասխան Փաշինյանի հայտարարության, ՀԱՊԿ-ն հայտարարեց, թե զորավարժությունները կարող են անցկացվել այլ երկրի տարածքում։
