Ալիևի ռեժիմը սպանել է իմ հորն ու հորեղբորը․ թալիշ իրավապաշտպան

Թալիշ իրավապաշտպան, լրագրող Ռահիմ Շալիևն իր թվիթերյան էջում հայտարարել է, որ Ադրբեջանը սպանել է երկու թալիշ դասախոսների, ինչպես նաև՝ իր հորն ու հորեղբորը:

«Ես թալիշ եմ, և մենք խնդիրներ ունենք։

Ադրբեջանի կառավարությունը սպանել է երկու թալիշ դասախոսների՝ Նովրուզալի Մամեդովին և Ֆախրադդին Աբասովին։ Կառավարությունը սպանեց նաև հորս ու հորեղբորս։

Ի՞նչ նկատի ունեք, երբ ասում եք, թե Ադրբեջանում ազգային փոքրամասնությունները խնդիրներ չունեն, հայերն էլ չեն ունենա»,-գրել է Շալիևը՝ ի պատասխան ալևիյան քարոզիչ Թողրուլ Թաղիզադեի՝ հայերին անջատողական անվանելու մեղադրանքի։

Վերջինս, դիմելով Արցախի պետնախարար Ռուբեն Վարդանյանին, գրել էր, թե «խաղաղությունը չի գալիս անջատողականությամբ և անօրինական ռազմական ռեժիմով»։

Նրա խոսքով, Ադրբեջանում ապրում են բազմաթիվ էթնիկ խմբեր, որոնք խնդիրներ չունեն, հետևապես հայերը ևս խնդիր չեն ունենալու։