2022 թվականին Հայաստանի օդանավակայաններից մեկնած և ժամանած ուղևորների թիվը աննախադեպ է՝ 3 մլն 697 հազար 539 մարդ։
Այդ մասին ԱԺ նիստի ընթացքում հայտարարեց ՀՀ տարածքային կառավարման և ենթակառուցվածքների նախարարի տեղակալ Արմեն Սիմոնյանը։
Նշյալ վիճակագրության մեջ, ըստ Սիմոնյանի, ՀՀ-ՌԴ ուղևորահոսքը կազմել է 1 մլն 458 հազար 718 ուղևոր։ Նրա խոսքով, ըստ ավիաընկերությունների, առաջին տասնյակում են, օրինակ, «FlyOne Արմենիա»-ն՝ 458․ 500 ուղևորով, որին հաջորդում են ռուսական «Ազիմուտ» և «Աէրոֆլոտ» ընկերությունները և այլ ավիաընկերություններ։
Բացի այդ, ըստ Սիմոնյանի, «Զվարթնոց» օդանավակայանի ընդլայնման վերաբերյալ «Արմենիա» միջազգային օդանավակայաններ» ՓԲԸ–ն առաջարկել է ներդրումային ծրագիր, որը պետք է իրականացվի առաջիկա 5 տարվա ընթացքում։ Նա ընդգծեց, որ խոսքը 350 մլն ԱՄՆ դոլարին համարժեք դրամ ներդնելու մասին է։
«Հարցը քննարկվել է հանրային ներդրումային կոմիտեում։ Այնտեղ կոնսենսիոն պայմանագրի հետ կապված որոշակի հարցեր կան, որոնք պետք է ուսումնասիրվեն»,– նշեց ՏԿԵ փոխնախարարը։
17:52
Մայիս 4, 2026
