Հունվարի 23-ին ԵՄ-ն կդիտարկի Հայաստան նոր առաքելություն ուղարկելու հարցը

Հունվարի 23-ին Բրյուսելում նախանշված է ԵՄ Արտաքին հարաբերությունների խորհրդի նիստը, որը նախագահելու է Եվրոպական միության արտաքին հարաբերությունների և անվտանգության հարցերով բարձր ներկայացուցիչ Ժոզեպ Բորելը։

Ակնկալվում է, որ Եվրոպական միության 27 անդամ երկրների արտաքին գերատեսչությունների ղեկավարները կընդունեն Հայաստան նոր առաքելություն գործուղելու որոշում:

«Այն պետք է նպաստի տարածաշրջանում կայունության հաստատմանը»,- հայտնել է Եվրամիության բարձրաստիճան անանուն դիվանագետը, փոխանցում է Ազատություն-ը:

Նրա խոսքով, Եվրոպական միությունը մտահոգությամբ է հետևում Լաչինի միջանցքի շուրջ ծավալվող իրադարձություններին և միջոցներ է ձեռնարկում իրավիճակը կարգավորելու համար:

Հիշեցնենք, որ էկոակտիվիստներ ներկայացող մի խումբ ադրբեջանցիներ անցյալ տարվա դեկտեմբերի 12-ից փակել են Արցախը Հայաստանի հետ կապող միակ ճանապարհը, պնդելով, թե, իբր, բողոքի ակցիայի նպատակն է «կանխել Լեռնային Ղարաբաղի տարածքում հանքերի ապօրինի շահագործումը և դրանից բխող բնապահպանական վտանգները»: