2023-01-22
Ներեվրոպական կրքեր․ Լեհաստանի վարչապետն առաջարկել է ստեղծել նոր կոալիցիա՝ առանց Գերմանիայի
Եթե Գերմանիան չհամաձայնի Ուկրաինա ուղարկել իր հիմնական Leopard 2 տանկերը, ապա կստեղծվի պետությունների նոր կոալիցիա, որոնք պատրաստ են ռազմական օգնություն ցուցաբերել Կիևին։
Այս մասին հայտարարել է Լեհաստանի վարչապետ Մատեուշ Մորավեցկին։
Նա նաև քննադատել է Գերմանիայի կանցլեր Օլաֆ Շոլցի անվճռականությունը տանկերի մատակարարման հարցում։
«Մենք կկառուցենք պետությունների «ավելի փոքր կոալիցիա», որոնք պատրաստ են իրենց ժամանակակից տանկերի, ժամանակակից տեխնոլոգիաների մի մասը փոխանցել Ուկրաինային», – ասել է Մատեուշ Մորավեցկին լեհական Polska Agencja Prasowa գործակալությանը տված հարցազրույցում:
Նա նաև խնդրել է Գերմանիայի կառավարությանը հստակ պատասխան տալ, թե արդյո՞ք այլ երկրներ, որոնք իրենց զինանոցում ունեն գերմանական Leopard 2 տանկեր, կարող են դրանք Գերմանիայի փոխարեն ուղարկել Ուկրաինա։
Հունվարի 20-ին գերմանական Ռամշտեյնում կայացել է ՆԱՏՕ-ի երկրների պաշտպանության նախարարությունների ներկայացուցիչների հանդիպումը։ Այն քննարկել է Ուկրաինա ծանր զինտեխնիկայի մատակարարման հարցը։
Գերմանիայի կանցլեր Օլաֆ Շոլցը հստակ պատասխան չի տվել Կիևին Leopard տանկեր տրամադրելու իր պատրաստակամության մասին, որի խնդրանքով դիմել է Ուկրաինան։
Նմանատիպ Նյութեր