Ֆրանսիայի նախագահ Էմանուել Մակրոնն այսօր՝ հունվարի 23-ին, Ելիսեյան պալատում կընդունի Ֆրանսիայի հայկական կազմակերպությունների համակարգող խորհրդի (CCAF) համանախագահներ Արա Թորանյանին և Մուրադ Փափազյանին։
Այդ մասին տեղեկացրել է Ֆրանսիայի նախագահի մամուլի ծառայությունը, փոխանցում է Nouvelles d’Arménie-ն։
Մակրոնն աառաջիկա հանդիպմանը հաստատելու է Հայաստանի անվտանգությանն ու կայունությանն իր անսասան հավատարմությունը, վերահաստատելու է Ֆրանսիայի հանձնառությունը՝ կանգնելու հայերի կողքին՝ արձագանքելով նրանց հումանիտար կարիքներին և նպաստելով երկրի կայունությանն ու զարգացմանը։
Ֆրանսիայի ղեկավարն անդրադառնալու է նաև վերջին մի քանի ամիսների ընթացքում ՀՀ վարչապետ Նիկոլ Փաշինյանի և Ադրբեջանի նախագահ Իլհամ Ալիևի հետ՝ իր նախաձեռնություններին, այդ թվում՝ 2022 թվականի հոկտեմբերի 6-ին Պրահայում կայացած քառակողմ գագաթնաժողովին, որի ընթացքում խրախուսել է երկխոսությունն ու կայուն լուծում գտնելու ուղղությամբ ջանքերի շարունակությունը։
Նշվում է, որ անդրադարձ է լինելու տարածաշրջանում տիրող լարվածությանը, այդ համատեքստում կարևորելով դեկտեմբերի 12-ից արգելափակված Լաչինի միջանցքով ազատ տեղաշարժի վերականգնումը։
17:53
Օգոստոս 10, 2026
