Ադրբեջանի արտաքին գործերի նախարար Ջեյհուն Բայրամովը չի հրավիրվել Բրյուսել՝ մասնակցելու Եվրախորհրդարանի արտաքին հարաբերությունների հարցերով կոմիտեի նիստին։
Այս մասին «Թվիթեր»-ի իր միկրոբլոգում հիստերիա է բարձրացրել Բրյուսելում (Բելգիայում) Ադրբեջանի դեսպան և Եվրամիությունում Ադրբեջանի առաքելության ղեկավար Վագիֆ Սադիկովը։
«Ինչպես միշտ, Ադրբեջանը հրավիրված չէ։ Ես սիրում եմ ԵԽ «հավասարությունը»: Եվրախորհուրդը նույնիսկ ժամանակ չի ծախսում թաքցնելու համար իր նախատրամադրվածությունը Ադրբեջանի դեմ»,- գրել է Սադիկովը Թվիթերում:
Հայաստանը նախօրեին հայտնեց, որ հրավեր ստացել է ԵԽ-ից, արտգործնախարար Արարատ Միրզոյանն արդեն գտնվում է Բրյուսելում, որտեղ ելույթ կունենա Եվրախորհրդարանի արտաքին հարաբերությունների հարցերով կոմիտեի նիստում և կներկայացնի Արցախում հումանիտար իրավիճակը՝ կապված Ադրբեջանի կողմից Լաչինի միջանցքի շրջափակման հետ։
Հայտնի է նաև, որ այսօրվա նիստին ԵՄ երկրների ԱԳՆ ղեկավարները որոշում կկայացնեն Հայաստան դիտորդական առաքելություն ուղարկելու մասին։
