Արդեն 45 օր շարունակ Արցախի շրջափակման և ադրբեջանի ցեղասապանական վարքի հերթական դրսևորման օրերին սփյուռքահայ համայնքային կառույցներն ու միավորները և Հայ Առաքելական եկեղեցու թեմերը, գործադրում են տեղեկատվական, քարոզչական, դիվանագիտական ջանքեր, ինչպես նաև բազում հումանիտար աջակցության ծրագրեր են իրագործում Արցախում շրջափակման մեջ գտնվող հայրենակիցների հոգսերն ինչ- որ չափով նվազեցնելու համար:
Այս մասին «Արցախպրես»-ի հետ զրույցում նշել է Արցախի Հանրապետության նախագահի՝ Սփյուռքի հարցերով խորհրդական Ազատուհի Սիմոնյանը:
«Ամանորի նախօրյակին, երբ հեռախոսազրույց ունեցա ԱՄՆ Արևմտյան թեմի առաջնորդ Թորգոմ Եպիսկոպոս Տոնոյանի հետ, նա ինձ փոխանցեց, որ Առաջնորդարան այցելած Ազգային «Վահան և Անուշ Շամլեան» վարժարանի առաջին կարգի փոքրիկ աշակերտները խնդրել են Սրբազան Հորը, որ «մենք նվեր չենք ուզում, մեր նվերները փոխանցեք Արցախի մանուկներին»:
Առաջնորդ սրբազան հայրը երեխաների խնդրանքին ընդառաջ տվել է իր օրհնությունը Արցախում բնակվող 101 բազմազավակ ընտանիքի (5 և ավելի երեխա ունեցող) և Ստեփանակերտի հանրապետական հիվանդանոցի վերակենդանացման բաժանմունքում գտնվող 10 ծանր հիվանդների օգնություն տրամադրելուն: Ծրագրի շահառու է դարձել Արցախի Հանրապետությունում բնակվող ընդհանուր առմամբ 111 ընտանիք»,-մանրամասնեց Ա. Սիմոնյանը:
Նրա տեղեկատվությամբ՝ ԱՀ սոցիալական զարգացման և միգրացիայի նախարարություն հետ համագործակցությամբ 111 ընտանիքի տրամադրվել է դրամական աջակցություն. ծրագիրն իրագործվել է «ԳՈՅ» մարդասիրական հիմնադրամի միջոցով:
«Այս ծրագիրը ոչ միայն ֆինանաական աջակցության է, այլև ապրումակցելու, զորակցության դրսևորում: Շրջափակման և բազում դժվարությունների դեմ հանդիման կանգնած քո հայրենակցին, չնայած մեծ հեռավորությանը նեցուկ կանգնելու ու քրիստոնեական ձեռքմեկնումի կեցվածք»,-ընդգծեց մեր զրուցակիցը՝ շնորհակալություն հայտնելով ԱՄՆ Արևմտյան թեմի առաջնորդ Թորգոմ եպիսկոպոս Տոնոյանին, թեմի բոլոր պատկան մարմիններին ու հանձնախմբերին, Ազգային վարժարանների ուսուցչական, ծնողական և աշակերտական կազմին իրենց դրսևորած կեցվածքի, Արցախն ու արցախցուն մենակ չթողնելու, նեցուկ կանգնելու հանձնառության համար:
«Այս հանգրվանն էլ պատվով կհաղթահարի արցախցին՝ կանգնած լինելով մեր ազգային արժանապատվության առաջնագծում, հենվելով համահայկական ամուր թիկունքին»,-համոզմունք հայտնեց Ազատուհի Սիմոնյանը:
