Ի՞նչ են քննարկել դեսպան Վաղարշակ Հարությունյանն ու ՌԴ փոխարտգործնախարարը

ՌԴ-ում Հայաստանի դեսպան Վաղարշակ Հարությունյանի և Ռուսաստանի Դաշնության արտաքին գործերի փոխնախարար Միխայիլ Գալուզինի հանդիպման ժամանակ քննարկվել են հայ-ադրբեջանական հարաբերությունների կարգավորման հարցերը։

Այս մասին հայտնում է ՌԴ ԱԳՆ մամուլի ծառայությունը։

«Մանրամասն զրույցի ընթացքում քննարկվել են երկկողմ օրակարգի ակտուալ հարցեր, ինչպես նաև Ռուսաստանի, Հայաստանի և Ադրբեջանի ղեկավարների միջև եռակողմ պայմանավորվածությունների հիման վրա հայ-ադրբեջանական հարաբերությունների կարգավորման խնդիրները»,- ասվում է ՌԴ ԱԳՆ տարածած հաղորդագրության մեջ։

Հիշեցնենք, որ 2020 թվականի նոյեմբերի 9-ին Ռուսաստանի, Հայաստանի և Ադրբեջանի ղեկավարներ Վլադիմիր Պուտինը, Նիկոլ Փաշինյանը և Իլհամ Ալիևը համատեղ հայտարարություն են ընդունել Արցախում հրադադարի մասին։

Հայտարարության համաձայն՝ նոյեմբերի 10-ից Լեռնային Ղարաբաղում ուժի մեջ է մտել կրակի ամբողջական դադարեցումը։

Հրադադարը և ռազմական գործողությունները վերահսկելու համար ԼՂ հակամարտության գոտում տեղակայված է Ռուսաստանի Դաշնության խաղաղապահ զորախումբը։