ՌԴ-ում գործ են հարուցել «Արցախ, մենք քեզ հետ ենք» ակցիայի մասնակիցների դեմ

Ռուսական ալիքները հայտնում են, որ ՌԴ Եկատերինբուրգ քաղաքում գործ է հարուցվել տեղի հայ համայնքի ղեկավար Մասիս Նազարյանի դեմ՝ ի պաշտպանություն Արցախի ցույց կազմակերպելուց հետո։

Նազարյանի դեմ գործը Եկատերինբուրգի Լենինյան շրջանային դատարանում է։

Ոստիկանությունը նրան մեղադրում է առանց ծանուցման հրապարակային միջոցառում կազմակերպելու մեջ (Վարչական իրավախախտումների վերաբերյալ օրենսգրքի 20.2-րդ հոդվածի 2-րդ մաս):

Նազարյանից բացի, նույն վարչական հոդվածով գործ է հարուցվել Հելեն Կիրակոսյանի նկատմամբ, նա մեղադրվում է նաև չարտոնված հանրահավաք կազմակերպելու մեջ։

Նշվում է, որ ակցիայի տեսագրության մեջ, որը հրապարակվել է սոցցանցերում, երևում է, թե ինչպես են Նազարյանն ու Կիրակոսյանը կանգնած Հայաստանի դրոշի և «Արցախ, մենք քեզ հետ ենք» պաստառի մոտ։

Նազարյանը 2003 թվականի հունվարից Սվերդլովսկի մարզում Անի-Արմենիա հայ համայնք հասարակական կազմակերպության խորհրդի նախագահն է։