Գեղարքունիքում ինժեներասակրավորային վաշտի կացարանում բռնկված հրդեհի հետևանքով Այրվածքաբանական ազգային ինստիտուտում բուժում ստացող 3 զինծառայողների կյանքին վտանգ չի սպառնում։
Այս մասին լրագրողների հետ ճեպազրույցում հայտնել է ՀՀ առողջապահության նախարար Անահիտ Ավանեսյանը։
«Երեք զինծառայողներից մեկի առողջական վիճակի հետ կապված 2 օր առաջ մի փոքր ծանրացում ունեինք։ Սակայն կոնսիլիում հրավիրվեց և բուժման մեջ փոփոխություններ մտցնելով` վիճակը կայունացավ։ Այս պահին բոլորի վիճակը գնահատվում է բավարար»,–ասել է նախարարը։
Ավանեսյանը հավելել է նաև, որ գիշերն է վերադարձել գործուղումից և այսօր պատրաստվում է Այրվածքաբանական կենտրոն այցելել և տեսակցել վիրավոր զինծառայողներին։
