Շրջափակման պատճառով ՀՀ-ում մնացած արցախցիների կացության ծախսերը կփոխհատուցվեն

ՀՀ Կառավարության այսօր ընդունած որոշմամբ՝ ԼՂ քաղաքացիներին կացություն տրամադրած կազմակերպությունները 2023թ․ հունվարի 10-ից մինչև հունվարի 25-ը ներառյալ կատարած հյուրանոցային ծառայությունների դիմաց կփոխհատուցեն։

2022թ. դեկտեմբերի 12-ից Լաչինի միջանցքի արգելափակման պատճառով ՀՀ-ում մնացած Արցախի շուրջ 486 քաղաքացիների կացությունը ապահովելու համար ՀՀ կառավարության որոշմամբ հատկացվել է 98 490 500 դրամ գումար։ Այդ գումարից 11.5 մլն-ը հատկացվել է Երևանի քաղաքապետարանին, 87 մլն-ը՝ Սյունիքի մարզպետարանին։

Կառավարության որոշման մեջ նշվում է, որ 2022 թվականի դեկտեմբերի 12-ից սկսած Լեռնային Ղարաբաղի մի շարք քաղաքացիներ դիմել են Հայաստանի Հանրապետությունում Լեռնային Ղարաբաղի օպերատիվ շտաբ և ՀՀ աշխատանքի և սոցիալական հարցերի նախարարության միասնական սոցիալական ծառայության գրասենյակներ` Լաչինի միջանցքի փակ լինելու հետևանքով կացություն չունենալու խնդրով։ Քաղաքացիները տեղավորվել են տարբեր հյուրանոցներում։