«Շատ կարևոր է, որ մենք պարեկային ոստիկանության նկատմամբ էլ շատ ուշադիր լինենք, որպեսզի ստանդարտի բարձրացում ունենանք, ոչ թե նվազում: Պետք է ընդհանրապես բացառել որևէ կոռուպցիոն դրսևորում պարեկային ոստիկանությունում»:
Այդ մասին կառավարության այսօրվա նիստում ընդգծեց վարչապետ Նիկոլ Փաշինյանը՝ անդրադառնալով պարեկային ոստիկանությանը։
Վարչապետը փաստեց, որ թե՛ 2019, և թե՛ 2020 և 2021 թվականների համեմատ՝ Հայաստանում արձանագրվել է ճանապարհատրանսպորտային պատահարների զոհերի և վիրավորների նվազում։
«Ինչ միջոցներ են ձեռնարկվել այս ամենի համար. առաջինն իհարկե խոսքը պարեկային ոստիկանության ներդրման մասին է և մենք տեսնում ենք, որ այս նվազումների վիճակագրության մեջ ամենամեծ տեղն ունի Երևանը, առաջինը հենց Երևանում է գործարկվել պարեկային ոստիկանությունը, հետո Շիրակի մարզում, Լոռու մարզում, նախորդ շաբաթ ծառայությունը սկսեց գործել նաև Արագածոտնի, Կոտայքի, Տավուշի և Գեղարքունիքի մարզերում»,- նշել է Փաշինյանը։
