Թուրքիայում երկրաշարժի հետևանքով հայազգի զոհերի թիվը հասել է 3-ի

Թուրքիայում գրանցված երկրաշարժի հետևանքով՝ Թուրքիայի և Սիրիայի հայկական համայնքներում ունենք զոհեր և վիրավորներ։

Այս մասին տեղեկացանք ՀՀ Սփյուռքի հանձնակատարի գրասենյակից․

«Աղետի գոտում հայտնված Թուրքիայի և Սիրիայի հայկական կրոնական, կրթական, համայնքային հաստատությունները մասնակիորեն տուժել են, կատարվում են ուսումնասիրություններ այդ կառույցների հետագա շահագործման հնարավորության առումով:

Մեր գրասենյակն անմիջական կապի մեջ է դիվանագիտական ներկայացուցչությունների, համայնքային կառույցների հետ և պարբերաբար հանդես կգա իրավիճակի վերաբերյալ հրապարակումներով:

Ինչպես հայտարարվել էր դեռ երեկ, Հայաստանը պատրաստ է օգնություն ցուցաբերել աղետի գոտիներին:

Միևնույն ժամանակ մեր խորին ցավակացություններն ենք հայտնում զոհվածների ընտանիքներին»:

Ավելի վաղ հայտնել էինք, որ երկրաշարժի հետևանքով Թուրքիայի Մալաթիա քաղաքում 2 հայ է զոհվել։ Այսօր մահացել է նաև նրանց մանկահասակ երեխան։

Ըստ պաշտոնական տվյալների Թուրքիայում և Սիրիայում տեղի ունեցած երկրաշարժի հետևանքով հայազգի զոհերի թիվն այս պահին 7-ն է։