Վիտալի Բալասանյանի դեմ քրեական գործ է հարուցվել

Արցախում քրեական գործ է հարուցվել Արցախի Անվտանգության խորհրդի նախկին քարտուղար Վիտալի Բալասանյանի դեմ։

Տեղեկությունը հաստատել է ԱՀ Դատախազության Հանրային կապերի բաժնի պետ Կիմ Գաբրիելյանը։

«Քրեական գործն առնչվում է Բալասանյանի պաշտոնավարման ժամանակահատվածում արձանագրված չարաշահումներին։ Բացառված չէ, որ առաջիկայում նա անգամ դատավարական կարգավիճակ ստանա»,–գրել է Փաստինֆո-ն։

Լրատվամիջոցի տեղեկություններով՝ մի քանի այլ դեպքերով էլ այս պահին նյութեր են նախապատրաստվում, որոնց հիման վրա ևս կարող են հարուցվել նոր քրեական գործեր։

Հիշեցնենք` հունվարի 7-ին Վիտալի Բալասանյանն ազատվել է ԱՀ Անվտանգության խորհրդի քարտուղարի պաշտոնից։ 2020-ի դեկտեմբերի 2-ին Արցախի նախագահ Արայիկ Հարությունյանի հրամանագրով Բալասանյանը նշանակվել էր ԼՂՀ անվտանգության խորհրդի քարտուղար։ Բալասանյանն անկուսակցական է, ունի Արցախի հերոսի կոչում։