Սա նոր գործելաոճ չէ. ԱԳ փոխնախարարը՝ Ադրբեջանի վարքագծի մասին

ԱԳ փոխնախարար Պարույր Հովհաննիսյանն անդրադարձել է հայ-ադրբեջանական խաղաղության համաձայնագրի համաձայնեցմանը և, չնայած դրան, Ադրբեջանի հռետորաբանությանը՝ նշելով, որ սա նոր գործելաոճ չէ:

«Նախկինում էլ ունեցել ենք մի քայլ առաջ, բայց այն կողմից եղել են բարդություններ, պրովոկացիաներ, երբեմն դիտվում էր երկու քայլ ետ»,- ասել է նա: Ըստ փոխնախարարի՝ 58 երկիր և 10 միջազգային կազմակերպություն ողջունել են համաձայնագրի վերջնական համաձայնեցումը՝ ընդգծելով ՀՀ դերը:

Նա հիշեցրել է, որ Հայաստանը շարունակում է առաջ մղել խաղաղության օրակարգը և այդ ուղղությամբ աշխատել միջազգային գործընկերների հետ:

Հարցին՝ ինչ կլինի, եթե դիտորդները ետ քաշվեն սահմանից, նա նշել է. «Այդ սցենարը քննարկելու կարիք չկա: Պայմանագիրը, ինչպես նշեցիք, այդքան էլ արագ չի շարժվում, պայմանագիրը ստորագրելու և վավերացնելու հարց կա: Իսկ դիտորդների մանդատը երկու տարով է: Իհարկե, հետագայում, եթե ունենանք այդ առաջընթացը՝ ստորագրենք, վավերացնենք և իսկապես կայուն խաղաղության նշաններ լինեն, մենք կարող ենք քննարկել նոր մանդատ ԵՄ դիտորդների համար, պարտադիր չէ միայն սահմանագծով սահմանափակվելը: Մանդատում կա նաև վստահության միջոցառումների ստեղծումը»,- ասել է նա:

Ըստ Հովհաննիսյանի, ապագայում, ամենադրական սցենարի դեպքում էլ, կկարողանանք գտնել ճիշտ մոդել, որպեսզի ԵՄ դիտորդների հետ շարունակենք համագործակցել:

Իսկ Երևանը վստա՞հ է, որ Բաքուն չի պահանջի առհասարակ ՀՀ-ից հանել նրանց, նա ասել է. «Ոչ մի բանի մեջ լիարժեք վստահություն չենք կարող ունենալ: Բայց երբ խոսում ենք երրորդ կողմի ուժերի մասին, արդյո՞ք ԵՄ դիտորդները ուժ են հանդիսանում: Սա դիտորդական առաքելություն է»: