Անհրաժեշտ է բարձր մակարդակով այց՝ Մոսկվա․ Հակոբյանը՝ Զախարովայի հայտարարության մասին

Լրագրող, Հայկական ուսումնասիրությունների ԱՆԻ կենտրոնի համակարգող և Ալիք Մեդիայի սյունակագիր Թաթուլ Հակոբյանը ֆեյսբուքի իր էջում գրում է․

«Այսօր, երբ Ռուսաստանը Մարիա Զախարովայի շուրթերով կրակ է թափում Հայաստանի հասցեին, իմ կարծիքով, չափազանց կարևոր են հետևյալ դիվանագիտական քայլերը.

ա/ հնարավոր բարձր մակարդակով այց կազմակերպել Մոսկվա,

բ/ անիմաստ չլարել հայ-ռուսական պրկված հարաբերությունները և փորձել դրանք լիցքաթափելու ուղիներ գտնել, այդ թվում՝ անցանկալի անձ հայտարարված մեկ կամ մի քանի մարդու հանել ցուցակից, օրինակ՝ պարոն Զատուլինին,

գ/ Հայաստանում ԵՄ առաքելությունը չդիտարկել հակառուսական քայլ, որքան էլ Մոսկվան և դաշնակից Բաքուն այդպես քարոզեն…

դ/ Հայաստանը դիտարկել ոչ թե Ռուսաստան-Արևմուտք առճակատման, այլ հնարավոր գործակցության կետ:

Կարելի է այս կետերը շարունակել:

Այո, Հայաստանը պետք է դիվերսիֆիկացիայի ենթարկի իր արտաքին և անվտանգային քաղաքականությունը, եթե Հայաստանի անկախութունը և ինքիշխանությունը բացարձակ արժեքներ են, բայց պետք է Երևան-Մոսկվա երկխոսությունը բերել կառուցողական հուն: Անկախ նրանից, թե ինչ սպառնալիքներ են հնչում և կհնչեն Մոսկվայից ու Բաքվից, Հայաստանը չպետք է և չի կարող լինել հակառուսական ճամբարում:

Բարդ է՞:

Անշուշտ, շատ բարդ է:

Պետք է աշխատել և հնարավոր սեղմ ժամկետներում ունենալ հնարավոր բարձր մակարդակով այց Մոսկվա»: