Հովիկ Աղազարյանի հետ վիճաբանած առևտրականն ազատ է արձակվել

ԱԺ «Քաղաքացիական պայմանագիր» խմբակցության պատգամավոր Հովիկ Աղազարյանի և առևտրականի միջև քաշքշուկի գործով, նախօրեին ձերբակալված անձն ազատ է արձակվել։ Այս մասին NEWS.am-ի հետ զրույցում ասաց Քննչական կոմիտեի նախագահի մամուլի քարտուղար Գոռ Աբրահամյանը։

«Այդ վարույթով դեռևս քրեական հետապնդում որևէ անձի նկատմամբ հարուցված չէ, նախաքննությունը շարունակվում է»,– նշեց Գոռ Աբրահամյանը։

Նշենք՝ երեկ՝ մարտի 3-ին, պատգամավոր Հովիկ Աղազարյանի և Երևանի Տիգրանյան փողոցում կարտոֆիլ վաճառողի միջև քաշքշուկ էր տեղի ունեցել: Պատգամավորը մեզ հետ զրույցում պատմել էր, որ կնոջ հետ առևտուր անելիս է եղել, երբ նկատել է, որ փողոցի երթևեկելի հատվածի մի մասը առևտրականները փակել և բանջարեղեն են վաճառում, հորդորել է բացել ճանապարհը, ինչին ընդդիմացել են առևտրականները և սկսվել է քաշքշոց։ Հովիկ Աղազարյանը հանցագործության մասին հաղորդում էր ներկայացրել Ոստիկանություն:

Քննչական կոմիտեից էլ հաղորդել էին, որ դեպքի առնչությամբ նախաձեռնվել է քրեական վարույթ ՀՀ ՔՕ 297 հոդվածի 1-ին մասի՝ հատկանիշներով (Խուլիգանությունը` հասարակության նկատմամբ անհարգալից կամ իրավական կամ բարոյական նորմերի նկատմամբ բացահայտ արհամարհական վերաբերմունք ցուցաբերելը, որը դրսևորվել է անձին ստորացնելով կամ մարդկանց անդորրը հայհոյանքներով կամ անպարկեշտ արտահայտություններով կամ նույն եղանակներով միջոցառումներ կամ արարողություններ խափանելով կամ հիմնարկների կամ կազմակերպությունների բնականոն աշխատանքը խոչընդոտելով):

ՔՊ-ական պատգամավորը տուժող էր ճանաչվել, իսկ առևտրականը՝ ձերբակալվել։