ՀՀ ԲՏԱ նախարարի գլխավորած պատվիրակությունը Էստոնիայում է

ՀՀ բարձր տեխնոլոգիական արդյունաբերության նախարարության նախաձեռնությամբ և էստոնական «Proud Engineers» թվային վերափոխման խորհրդատվական ընկերության հրավերով, նախարար Մխիթար Հայրապետյանի գլխավորած պատվիրակությունն աշխատանքային այցով գտնվում է Էստոնիայի Հանրապետությունում։ Այցի նպատակն է տեղում ուսումնասիրել Էստոնիայի առաջադեմ փորձը թվային կառավարման, կիբեռանվտանգության և հանրային ծառայությունների թվայնացման ոլորտներում, ինչպես նաև կազմակերպել առարկայական քննարկումներ Հայաստանի և Էստոնիայի միջև երկկողմ համագործակցության խորացման ուղղությամբ։

Հաշվի առնելով Էստոնիայի հետ միջպետական համագործակցության ռազմավարական կարևորությունը և այցի նպատակը՝ պատվիրակության կազմում ներգրավվել են մի շարք գերատեսչությունների ներկայացուցիչներ, այդ թվում՝ ՀՀ ԲՏԱ նախարարի առաջին տեղակալ Գևորգ Մանթաշյանը, ՀՀ պետական եկամուտների նախագահ Էդուարդ Հակոբյանը, ՀՀ կադաստրի կոմիտեի ղեկավար Սուրեն Թովմասյանը, ՀՀ տարածքային կառավարման և ենթակառուցվածքների նախարարի տեղակալ Վարդան Կոստանյանը, ՀՀ պետական եկամուտների նախագահի տեղակալ Ռաֆայել Գևորգյանը, ՀՀ վարչապետի աշխատակազմի ղեկավարի տեղակալ Արմենակ Խաչատրյանը և ՀՀ փոխվարչապետ Մհեր Գրիգորյանի գրասենյակի ղեկավար Էդգար Մկրտչյանը, Տեղեկատվական համակարգերի գործակալության տնօրեն Ներսես Երիցյանը և այլ պաշտոնատար անձինք։

Ապրիլի 1-ին մեկնարկել են նախատեսված աշխատանքային քննարկումները։ «e-Estonia Briefing» կենտրոնում ՀՀ պատվիրակության համար ներկայացվել է «Էստոնիայի թվային փոխակերպման ընդհանուր տեսություն» շնորհանդեսը, որի շրջանակում քննարկվել են թվային կառավարման հիմնական մեխանիզմները և դրանց արդյունավետ կիրառման ուղիները։ Այնուհետև պատվիրակությունն այցելել է «Proud Engineers»-ի գլխավոր գրասենյակ։
Հանդիպման ընթացքում «Proud Engineers»-ի հիմնադիր, Էստոնիայի կառավարության տեղեկատվական տեխնոլոգիաների գծով առաջին տնօրեն Թաավի Կոտկան ներկայացրել է «Հանրային հատվածի ներգրավումը բարդ բարեփոխումների իրականացման գործընթացում» թեմայով զեկույցը՝ ընդգծելով բարեփոխումներին նպաստող մտածողության ձևավորման կարևորությունը և ներկայացնելով Էստոնիայի տվյալ ոլորտում ունեցած հաջողված փորձը:

Այնուհետև «Proud Engineers»-ի գլխավոր տեղեկատվական տեխնոլոգիաների գծով տնօրեն, Էստոնիայի կառավարության տեղեկատվական տեխնոլոգիաների գծով նախկին գլխավոր տնօրեն Անդրես Կյուտը հանդես է եկել «Հանրային հատվածի մարտահրավերները․ սխալներից խուսափելու և կայուն քաղաքականություն մշակելու ուղիներ» զեկույցով՝ ներկայացնելով պետական կառավարման ոլորտում կայուն քաղաքականության մշակման կարևոր մեխանիզմները։
Հանդիպմանը մասնակցել է նաև SK ID Solutions AS ընկերության գլխավոր տնօրեն Կալև Փիհլը, ով «Թվային ինքնության և վստահելի ծառայություններ» զեկույցում անդրադարձել է անվտանգ և արդյունավետ էլեկտրոնային ինքնության ու թվային ստորագրման լուծումներին։

Քննարկումների ավարտին «Proud Engineers»-ի և ԱՀԿ (Առողջապահության համաշխարհային կազմակերպություն) eHealth փորձագետ Իգոր Բոսսենկոն ներկայացրել է «Կայուն և փոխգործունակ էլեկտրոնային առողջապահական էկոհամակարգի ձևավորում» թեմայով զեկույցը, որտեղ քննարկվել են թվային առողջապահական համակարգերի ներդրման փորձը և դրանց կիրառելիությունը։
Այցի շրջանակում, Հայաստանի և Էստոնիայի արտաքին գործերի նախարարությունների, Էստոնիայում ՀՀ դեսպանության և «Proud Engineers» ընկերության աջակցությամբ, նախատեսվում են նաև հանդիպումներ բարձր տեխնոլոգիական ոլորտի առաջատար մասնագետների, ինչպես նաև Էստոնիայի միջազգային զարգացման կենտրոնի (ESTDEV) ներկայացուցիչների հետ՝ քննարկելու երկկողմ հնարավոր համագործակցության նոր ուղիները։