ՀՀ-ն անում է ամենը կանանց ներգրավվածության ուղղությամբ. Մկրտչյան

ՄԱԿ կանանց կարգավիճակի հարցերով հանձնաժողովի 67-րդ նստաշրջանի (CSW67) շրջանակում՝ Աշխատանքի և սոցիալական հարցերի նախարար Նարեկ Մկրտչյանը մասնակցել է «Գենդերային բաժանումը շրջանցելու հարցում խոչընդոտների հաղթահարում և թվային դարաշրջանում կրթության խթանում» թեմայով նախարարական կլոր-սեղանին։

Նախարար Մկրտչյանն իր խոսքում ընդգծել է կանանց տնտեսական զորեղացման, նրանց ներուժի բացահայտմանն ու մասնագիտական կարողությունների զարգացմանն ուղղված աշխատանքների կարևորությունը։ Վերջինս նշել է, որ Հայաստանի Հանրապետությունն անում է ամենը՝ տարբեր ոլորտներում կանանց ներգրավվածության և որոշումների կայացման գործընթացներում լիարժեք մասնակցության ապահովման ուղղությամբ․

«ՀՀ կառավարությունը շարունակաբար իրականացնում է միջոցառումներ, որոնք նպատակ ունեն խթանել կանանց ձեռնարկատիրությունն ու զբաղվածությունը տնտեսական բարձր արտադրողականություն ունեցող ոլորտներում։ Եթե ունես հմտություններ, որոնք շուկայում պահանջված են, ապա կարող ես աշխատանք գտնել: Թվային մարքեթինգն այսօր ամենապահանջված ոլորտներից մեկն է աշխարհում, և հենց այս ոլորտում էլ փորձում ենք նոր հմտություններ ու հնարավորություններ ստեղծել աշխատաշուկայից դուրս մնացած կանանց համար»,- նշել է Ն․ Մկրտչյանը՝ մանրամասներ ներկայացնելով ՀՀ–ում գործարկված «Պլատֆորմ 5» ծրագրի մասին։

Նախարարը հույս է հայտնել, որ նմանօրինակ միջոցառումներն իրապես կնպաստեն կանանց և աղջիկների ներուժի խթանմանն ու տնտեսական զորեղացմանը։