«Եթե ունենանք իրավիճակ, որ մնացել է երկու-երեք օր, որ մենք թուղթ ենք ստորագրելու, իրականում դա լավ նորություն է, և ոչ՝ վատ, որովհետև դա նշանակում է, որ բանակցային գործընթացներով ունեցել ենք առաջընթաց և հասել ենք արդյունքի»,- լրագրողների հետ հանդիպմանը հայտարարել է ՀՀ վարչապետ Նիկոլ Փաշինյանը։
Նրա խոսքով ՝ այդ արդյունքը մեր երազանքների արդյունքը չէ, բայց, այնուամենայնիվ, արդյունք է, որը պետք է ապահովի երկարաժամկետ խաղաղություն, կայունություն և զարգացում։
«Կա՞ արդյոք փաստաթուղթ։ Դուք գիտեք, որ փետրվարի կեսերին մենք մեր արձագանքը խաղաղության պայմանագրի հնարավոր նախագծի վերաբերյալ փոխանցել ենք Ադրբեջանին (մի նախագիծ կա իրականում)։ Եվ երկու-երեք օր առաջ ստացել ենք Ադրբեջանի արձագանքը մեր նախագծի վերաբերյալ։ Ի՞նչ կարող եմ ասել այդ փաստաթղթի առումով․ կա՞ արդյոք առաջընթաց փաստաթղթում։ Պետք է ընդգծել, որ որոշակի առաջընթաց տեսնում ենք, բայց որքան առաջ ենք գնում, այնքան ի հայտ են գալիս ֆունդամենտալ պրոբլեմներ»,- ասել է Փաշինյանը։
Վարչապետը ներկայացրել է ադրբեջանական կողմի ստեղծած խնդիրները. «Ադրբեջանը փորձում է խաղաղության, հարաբերությունների հաստատման հնարավոր պայմանագրի միջոցով Հայաստանին տարածքային պահանջներ, նկրտումներ ձևակերպել, ինչը, հասկանալիորեն, կարմիր գիծ է մեզ համար։ Հաջորդը՝ տեսնում ենք, որ այդ տեքստի առաջարկներով Ադրբեջանը փորձում է ԼՂ-ում ցեղասպանություն կամ էթնիկ զտումներ իրականացնելու մանդատ ձեռք բերել, այդ թվում՝ ՀՀ ստորագրությամբ։ Դա, բնականաբար, նույնպես կարմիր գիծ է մեզ համար։ Տեսնում ենք նաև, որ Ադրբեջանը հետապնդում է այնպիսի գիծ, որ մենք նույնիսկ ստորագրված պայմանագրի կատարման երաշխիքների համակարգ չունենանք, ինչը նույնպես կարմիր գիծ է մեզ համար։ Այսօր մենք ունենք գրված, ստորագրված փաստաթուղթ, որը չի կատարվում։ Խոսքը 2020թ. նոյեմբերի 9-ի եռակողմ հայտարարության մասին է, որի համաձայն՝ Լաչինի միջանցքը որևէ կերպ փակ չպետք է լիներ, բայց այն փակ է։ Հետևաբար, սա ավելի է ընդգծում ՀՀ զգայունությունն այն հարցում, որ որևէ փաստաթուղթ, որ կստորագրվի, պետք է ունենա իրականացման երաշխիքներ, ցանկալի է՝ միջազգային երաշխիքներ»։
