Սահմանին սադրանքների թիվը որոշակիորեն նվազել է. Հովհաննիսյան

Սահմանին սադրանքների թիվը որոշակիորեն նվազել է. այս մասին խորհրդարանում հայտարարել է ՀՀ ԱԳ փոխնախարար Պարույր Հովհաննիսյանը: Նրա կարծիքով՝ ԵՄ առաքելության տեղակայումը որոշակի դեր խաղաց ավելի լայնածավալ սադրանքը կանխելու գործում։ Այս մասին Հովհաննիսյանն ասել է՝ պատասխանելով «Հայաստան» խմբակցության պատգամավոր Ագնեսա Խամոյանի հարցին:

Պատգամավորը նկատել է, որ ՌԴ-ն ԵՄ առաքելության տեղակայումը ընկալում է որպես իր դեմ արված քայլ, իսկ արևմուտքից գնահատականներ են հնչում, որ դա ինչ-որ կերպ նաև զսպող հանգամանք է ՌԴ-ի համար։ «Մենք ի՞նչ անենք այդ լարվածության մեջ չընկնելու համար»,-հարցրել էր Խամոյանը:

«Շարունակում ենք բացատրել, թե ինչն էր պատճառը և որն է առաքելության նպատակը։ Իրանը ևս զգայուն է տարածաշրջանում նման առաքելությունների հանդեպ և դրական արձագանք տվեց։ Սա ցույց է տալիս, որ բացատրական աշխատանքի դեպքում ընկալումն այլ է, և մյուս գործընկերների հետ էլ պետք է շարունակենք աշխատել ու ավելի շատ աշխատել»,-ասել է փոխարտգործնախարարը։