Իրանա-հայ եղբայրությունն ամրապնդվել է, և Իրանը մեղադրում է Բաքվին․ Ադրբեջանի ՊՆ

Ադրբեջանի պաշտպանության նախարարությունը հանդես է եկել հաղորդագրությամբ՝ ի պատասխան Իրանի Իսլամական Հանրապետության բանակի ցամաքային զորքերի հրամանատար Քիումարս Հեյդարիի՝ առավոտյան հնչեցրած հայտարարության։ 

Հեյդարին հայտարարել է, որ Կովկասում կան շատ զգայուն հարցեր։ Դրանցից մեկն Ադրբեջանում սիոնիստական ռեժիմի տարրերի առկայությունն է։ Նա նաև նշել է, որ Իրանը հարգում է հարևան երկրների սահմանները և թույլ չի տա, որ դրանք փոխվեն։ 

Ադրբեջանի ՊՆ-ն այս հայտարարությունները զրպարտանք է անվանել։ «Իր անհեթեթ հերյուրանքներում Հեյդարին պնդում է, որ իբր Ադրբեջանում կան սիոնիստական ուժեր, և որ 44-օրյա պատերազմում Ադրբեջանն օգտագործել է Սիրիայից բերված ահաբեկիչների, որոնք, ըստ նրա, դեռ երկրում են։ Հայտարարում ենք, որ իրանական կողմի մեղադրանքներն Ադրբեջանի տարածքում օտարերկրյա որևէ ուժի առկայության վերաբերյալ անհիմն են և միանգամայն անընդունելի»։ 

Ադրբեջանի ՊՆ-ն նշել է, թե իրանական կողմը երբեք մեղադրանքներ չի ներկայացնում Հայաստանին։ Ընդհակառակը, այս ընթացքում ամրապնդվել է իրանա-հայ եղբայրությունը։

«Այսօր գաղտնիք չէ, որ աշխարհում Հայաստանի գլխավոր դաշնակիցներն են Ֆրանսիան և Իրանը։ Ադրբեջանն աջակցում է բոլոր երկրների տարածքային ամբողջականությանը և չի միջամտում այլ պետությունների ներքին գործերին»,- ասված է հայտարարությունում։