ՀՀ ՊԵԿ նախագահ Ռուստամ Բադասյանը տեղեկացրել է, որ կանխիկով գործարքների սահմանափակումներ ենթադրող օրենսդրության ընդունումից հետո կար շուրջ 40․940 սուբյեկտ, որոնց ՀԴՄ-ների վրա ակտիվացված չէին փոս-տերմինալները.
«Այսօր ԿԲ հետ համագործակցության արդյունքում մոտ ենք փոս-տերմինալների ակտիվացման 100% ցուցանիշին։
Ընդամենը չնչին՝ իմ նշած թվի 10%-ից էլ քիչ հատվածն է, որ վերջնական միջոցառումներ չի ձեռնարկել, և բոլորի նկատմամբ իրականացվում է խիստ հսկողություն, որ օրենքի պահանջը վերջնականապես իրականացվի»։
Ըստ Բադասյանի՝ կանխիկի սահմանափակումները ոչ միայն ՀԴՄ սարքերի միջոցով կատարվող գործարքների նկատմամբ են կիրառվում, այլև խոշոր գործարքների.
«ՊԵԿ-ը հսկիչ գնումներ էլ է անում, և իմ հորդորն է՝ կանխիկի սահմանափակումները խստիվ պահպանվեն, հակառակ դեպքում օրենսդրությամբ բավական խիստ միջոցներ են նախատեսված»։
Նիկոլ Փաշինյանն էլ նշեց, որ հսկայական ծավալների անշարժ գույքի գործարքներ են կատարվում, և հորդորեց առքուվաճառքն իրականացնել անկանխիկ.
«Հորդորում եմ իրենց սեփականությունը կասկածի տակ չդնել, որովհետև զարտուղի ճանապարհով ձեռք բերված սեփականության իրավունքը վաղը, մյուս օրը ուղղակի կարող է վիճարկվել»։
