ՌԻԱ-Նովոստին հայտնում է, որ Կազանում «մարդատար ավտոմեքենան վրաերթի է ենթարկել ավտոբուսի կանգառի մի խումբ անձանց»: Թաթարստանի առողջապահության նախարարության տվյալներով՝ «միջին եւ ծանր վնասվածքներով հոսպիտալացվել է տասնմեկ մարդ, այդ թվում՝ տասներկուամյա երախա, եւս երկու մարդ բժշկական օգնություն է ստացել տեղում»:
ՌԻԱ-Նովոստին վկայակոչում է Թաթարստանի դատախազության պաշտոնական հաղորդագրությունը, ըստ որի՝ «տղամարդը վարձակալած ավտոմեքենայով փորձել է վազանցել կանգառին մոտեցած ավտոբուսը եւ վրաերթի է ենթարկել տրանսպորտային միջոցից իջնող անձանց»: ՌԴ Քննչական կոմիտեի Թաթարստանի վարչությունը հարուցել է քրեական գործ՝ «ճանապարհային երթեւեկության կանոնները խախտելու» հոդվածով: Վարորդի ինքնությունը չի բացահայտվում, հայտնի չէ նաեւ, թե նրա նկատմամբ խափանման ինչ միջոց է ընտրված:
Անցյալ շաբաթ Ռուսաստանի Անվտանգության դաշնային ծառայությունը տեղեկություն է տարածել, որ Դաղստանի Կասպիյսկ քաղաքում «վնասազերծվել է զինված ահաբեկչական խումբ»: Ըստ այդմ, չորս «զինառյալներ, որ պատրաստվում էին ահաբեկչություն իրականացնել ՆԳՆ քաղաքային վարչության դեմ, փոխհրաձգության մեջ են մտել իրավապահների հետ եւ տեղում ոչնչացվել»:
Պաշտոնական տեղեկատվության համաձայն՝ «քաղաքացիական անձանց եւ իրավապահ մարմինների աշխատակիցների շրջանում կորուստներ եւ տուժածներ» չեն եղել:
Սոցիալ-հոգեբանական ի՞նչ իրավիճակ է Ռուսաստանի իսլամադավան սուբյեկտներում՝ տեղեկատվությունը սահմանափակ է: Ընդհանուր պատկերի մասին կարելի է դատել մամուլի «մակերեսային բնույթի» հրապարակումներից: Այդ առումով ուշադրության է արժանի Թաթարստանում «կրոնական համերաշխության» մասին «Նեզավիսիմայա գազետա»-ի մի հրապարակումը, որից պարզ է դառնում, որ Ռուս ուղղափառ եկեղեցին լարված հարաբերություններ ունի ինքնավարության ղեկավար Մեննիխանովի հետ:
Վերջինս, ըստ տեղեկությունների, տարեվերջին Ռուսաստանի նախագահին բողոքել է, որ Մոսկվայի եւ Համայն Ռուսիո պատրիարք Կիրիլի անմիջական հանձնարարությամբ Թաթարստանում ծրագրվում է վերականգնել «ուղղափառ թաթարների համայնքը»:
Խոսքը ցարական տիրապետության շրջանում հարկադրաբար քրիստոնեություն ընդունած թաթարների ժառանգներին ուղղափառ դավանանքի վերադարձնելու մասին է: Ինչպես իրազեկ աղբյուրներն են ռուսաստանյան մամուլին ասել՝ Վլադիմիր Պուտինը Կիրիլ պատրիարքին «խնդրել է» կասեցնել գործընթացը: Ասվածը վկայում է, որ ինչպես Հյուսիսային Կովկասում, այնպես էլ Թաթարստանում եւ Վոլգայի ավազանի այլ տեղաշրջաններում արձանագրվում է իսլամադավանության կտրուկ աճ:
Ամենեւին էլ բացառված չէ, որ Կազանում ավտոբուսի կանգառը «գրոհած» մեքենայի վարորդը «ծայրահեղական իսլամադավան» է եւ այդ քայլին գնացել է գիտակցաբար:
Ռուս-ուկրաինական պատերազմը բացահայտել է Ռուսաստանի իսլամադավան սուբյեկտների սոցիալ-հոգեբանական «երկվությունը»: Այդ առթիվ իշխանությունների անհանգստությունն արտահայտվում է նաեւ միգրացիոն քաղաքականությամբ. Կենտրոնական Ասիայի իսլամադավան երկրներից տասնյակ հազարավոր «աշխատանքային միգրանտներ» արդեն իսկ արտաքսվել են, սահմանվել են կեցության եւ աշխատանքի ընդունման կարգի խիստ կանոններ: Ռուսաստանի իսլամադավան սուբյեկտներում, իրոք, անհանգիստ է: Ինչպե՞ս են իշխանություններն այդ տրամադրությունները կառավարելու՝ առայժմ պարզ չէ:
Թիվ 1 սյունակ, Վահրամ Աթանեսյան
