ՀՀ առողջապահության նախարար Անահիտ Ավանեսյանն անդրադարձել է կորոնավիրուսի համավարակի դեմ պայքարին։
Նա նշել է, որ որքան անցնում է ժամանակը, այնքան ավելի հեշտ է հետահայաց համեմատություններ անելն ու գնահատականներ տալը.
«Պետք է մշտապես հիշել, որ ցանկացած քաղաքականություն, որ գնահատում ենք, պետք է դիտարկել այդ ժամանակամիջոցի բժշկագիտական և այլ տեղեկատվական շրջանակների մեջ»։
Խոսելով կորոնավիրուսից մահացությունների ցուցանիշների մասին՝ Ավանեսյանը նշել է, որ դրանք պետք է համադրել մեզ հետ համեմատելի այլ երկրների ցուցանիշների հետ. «Մեզ մոտ մոտավորապես 8700 մահացություն եղավ»,- ասել է նա՝ կոչ անելով համեմատել հարևան երկրների ցուցանիշների հետ.
«Որոշների համեմատ Հայաստանում կրկնակի քիչ են եղել մահացություններն, այն դեպքում, երբ մի կողմից Հայաստանը դիմակայում էր համավարակի մարտահրավերին, մյուս կողմից՝ պատերազմին։
Ուստի, կարծում եմ, սա շատ խոսուն գնահատական է»։ Նա կարևորել է այդ օրերին համապատասխան բուժսարքավորումների և անհատական պաշտպանության միջոցների առկայությունը.
«Եվրոպական զարգացած, հարուստ երկրներ ևս տարրական բուժսարքավորումների, դիմակների և այլնի խնդիրներ ունեին։ Հայաստանը ոչ մի օր որևէ բանի պակաս կամ խնդիր չի ունեցել»,- շեշտել է Ավանեսյանը։
Նախարարն անդրադարձել է նաև պատվաստումներին՝ ընդգծելով, որ առաջին օրվանից պետությունն արել է ամեն ինչ, որպեսզի երկրում հասանելի լինեն թե՛ եվրոպական, թե՛ ռուսական, թե՛ չինական, թե՛ այլ երկրների բոլոր պատվաստանյութերը։
