«Քըլըչդարօղլուի հակառուսական ելույթները վնասում են Թուրքիային»․ Չավուշօղլու

Պոպուլիզմն առանձին ընդդիմադիր քաղաքական գործիչների հռետորաբանության մեջ, ովքեր հակառուսական հայտարարություններով փորձում են հաճոյանալ Արևմուտքին, վնաս են հասցնում մեր երկրին։ Այս մասին հայտարարել է Թուրքիայի արտգործնախարար Մևլութ Չավուշօղլուն՝ Անթալիայում մեկնաբանելով նախագահի ընդդիմադիր թեկնածու Քեմալ Քըլըչդարօղլուի հայտարարությունները Մոսկվայի դեմ սահմանափակող ռեժիմին աջակցելու պատրաստակամության մասին։

«Ի՞նչ օգուտ կբերեն Ռուսաստանի Դաշնության դեմ պատժամիջոցները Թուրքիային և ուղղակիորեն Անթալիայի բնակիչներին։ Հակառուսական խոստումներ տվողները մտածու՞մ են զբոսաշրջության ու արտահանողների մասին։ Երբեմն ինձ հարցնում են՝ ինչպե՞ս է արտաքին քաղաքականությունն ազդում շարքային քաղաքացիների վրա։ Կա հստակ օրինակ»,- ասել է Չավուշօղլուն։

Նրա խոսքով՝ Քըլըչդարօղլուի հակառուսական հայտարարությունների պատճառով այսօր Ռուսաստանից զբոսաշրջիկների հոսքի նվազում է նկատվում։ Անդրադառնալով «հացահատիկային միջանցքի» թեմային՝ Չավուշօղլուն նշել է, որ թուրքական չոր բեռնատար վեց նավ չի կարողացել վերադառնալ հայրենիք։ 

«Նախորդ օրը ես զանգահարել էի իմ ռուս գործընկեր Սերգեյ Լավրովին։ Ռուսական կողմն աջակցություն է խոստացել Նիկոլաևի և Օլբիայի նավահանգիստներով թուրքական նավերի անցման հարցում։ Նույն արձագանքն ենք ակնկալում Ուկրաինայի ընկերներից»,- ասել է թուրք նախարարը։