Խորհրդարանական ու արտախորհրդարանական ընդդիմությունը պետք է միասնական ճակատով հանդես գա. Մինասյան

ԱԺ «Հայաստան» խմբակցության քարտուղար Արծվիկ Մինասյանը հայտարարել է, թե խորհրդարանական ու արտախորհրդարանական ընդդիմությունը պետք է միասնական ճակատով հանդես գա։ 

«Ինչ վերաբերում է հասարակությունը մոբիլիզացնելու ուղղությանը, ակնհայտ է, որ թե խորհրդարանական, թե արտախորհրդարանական ընդիմադիր դաշտը հիմա ամեն ինչ պետք է անեն միասնական ճակատով հանդես գալու, սա համազգային, համաժողովրդական խնդիր է։

Դրա համար մեր մոտեցումը հետևյալն է՝ որևէ ամբիցիա դնել մի կողմ, համախմբվել՝ կասեցնելու համար, իսկ կասեցման համար շատ ժամանակ չունենք: Այսօր Հայաստանի արտաքին քաղաքական տեսակետից ակնհայտ է, որ ժամանակ շահելու խնդիր կա»,- ասել է նա։ 

Ըստ Արծվիկ Մինասյանի եթե Ադրբեջանը ցանկություն ունենա պարտադրել նոր կապիտուլյացիա, այս իշխանությունը գնալու է դրան. «Մեր համախմբման նպատակը պետք է սա լինի, ու մենք ողջունում ու աջակցում ենք ցանկացած ընդդիմադիր շարժմանը, որը միտված է այս միասնական ճակատը ձևավորելուն»:

Մինասյանն ասել է նաև, որ երբ  իշխանությունն ավարտվեց,  գալու է պատասխան տալու ժամանակը, իսկ պատասխանը դաժան է լինելու. «Պատասխանատվության ամենախիստ դրսևորմանն են արժանի այս իշխանությունները»։