Նախարարներից պահանջվում է հետագա աշխատանք առանցքային հարցերի շուրջ. ԱԳՆ խոսնակ

ՀՀ ԱԳՆ խոսնակ Անի Բադալյանը մանրամասնել է, թե վաշինգտոնյան բանակցությունների հերթական փուլի արդյունքում Հայաստանի և Ադրբեջանի ԱԳ նախարարները առանցքային ո՞ր հարցերի շուրջ չեն հասել համաձայնության, ըստ այդմ, դեռ հետագա քննարկման անհրաժեշտություն կա։

«Հայաստանի ու Ադրբեջանի դիրքորոշումները մի քանի առանցքային հարցերի շուրջ պահանջում են հետագա աշխատանք: Խոսքը վերաբերում է Հայաստանի և Ադրբեջանի միջև սահմանազատմանը, զորքերի հետքաշմանը և Բաքու-Ստեփանակերտ երկխոսության միջազգային մեխանիզմի ստեղծմանը»,- ասել է նա

Հիշեցնենք՝ երեկ ՀՀ ԱԳՆ-ն հայտնել էր, որ Հայաստանի ու Ադրբեջանի ԱԳ նախարարներն ու նրանց թիմերը շարունակել են առաջընթացը «Խաղաղության և միջպետական հարաբերությունների հաստատման մասին» երկկողմ համաձայնագրի նախագծի շուրջ: Նրանք համաձայնության են հասել համաձայնագրի նախագծի ևս մի քանի հոդվածների շուրջ և գրանցել փոխըմբռնման առաջընթաց՝ միևնույն ժամանակ արձանագրելով, որ մի քանի առանցքային հարցերի շուրջ դիրքորոշումները պահանջում են հետագա աշխատանք: