Ադրբեջանը փորձում է հնարավոր բոլոր միջոցներով վնաս հասցնել ՀՀ-ի տնտեսությանը. Աբրահամյան

«Ադրբեջանը հետպատերազմյան ժամանակահատվածում ցույց է տվել, որ իր համար հարվածի ուղղությունները ոչ միայն ռազմաճակատն է, քաղաքական բանակցային գործընթացը, այլ նաև տնտեսականը»,-«Երկրի հյուրասրահում» հաղորդման ժամանակ ասաց «Պատիվ ունեմ» խմբակցության քարտուղար Տիգրան Աբրահամյանը՝ պատահական չհամարելով նաև Սոթքի ուղղությամբ ադրբեջանական զինուժի հրադադարի խախտման դեպքերը:

Նկատելով, որ Սոթքում Ադրբեջանն իր նպատակին հասավ և ոսկու հանքի բաց շահագործումը դադարեցվեց, շատերը կորցրեցին իրենց աշխատանքը՝ ընդդիմադիր պատգամավորը հայտնեց, որ դրանից հետո թիրախավորվել է Երասխի գործարանի կառուցման գործընթացը:

«Ադրբեջանը փորձում է հնարավոր բոլոր միջոցներով վնաս հասցնել Հայաստանի տնտեսությանը, փորձում է ազդակ տալ միջազգային տարբեր ներդրողներին, թե Հայաստանում անվտանգ չէ ներդրումներ անելը»,-եզրակացրեց Աբրահամյանը:

Նրա խոսքով՝ այն չի նշանակում միայն սահմանամերձ համայնքների ներդրումների նվազում, այլ որ ցանկացած ներդրող Հայաստան գալուց առաջ կարող է մի պահ մտածել, որ դրանք կարող են վնասվել, ինչը բերելու է Հայաստանի նկատմամբ ներդրումային հետաքքրությունների նվազմանը: