ՌԴ նախագահ Վլադիմիր Պուտինն ասել է, որ որոշ հարցերի պատասխաններ փնտրելիս՝ շուրջօրյա մտածում է դրանց մասին, հետո լուծումներն իրենք են գալիս, բոլորովին անսպասելի։ Այս մասին գրել է ТАСС-ը։
Ռուսաստանի ղեկավարը, մասնակցելով ապագա տեխնոլոգիաների ֆորումի «Հաշվարկներ ու հաղորդակցություններ։ Քվանտային աշխարհ» լիագումար նիստի քննարկմանը, ասել է, որ իրեն հաճախ են հարցնում, թե ինչպես է ինչ-որ հարցով որոշում կայացրել։ «Պատասխանը շատ պարզ է։ Ես անընդհատ մտածում եմ այդ մասին՝ օր ու գիշեր։ Ես քնում եմ – մտածում եմ դրա մասին, արթնանում եմ – մտածում եմ դրա մասին: Ինչ-որ հարցի լուծումը միանգամայն անսպասելի է գտնվում»,- ասել է Պուտինը։
Նրա զրուցակից, Ռուսաստանի գիտությունների ակադեմիայի Պ. Ն. Լեբեդևի անվան ֆիզիկական ինստիտուտի գիտաշխատող Իլյա Սեմերիկովը, որն աշխատում է քվանտային համակարգչի ստեղծման վրա, իր հերթին ասել է, որ այս գործընթացը կլանում է իր ողջ ժամանակը և ուշադրությունը։
«Ամեն ինչ … պտտվում է երկու բանի շուրջ՝ քվանտային համակարգիչ ու մարդիկ: Սրանք այն երկու բաներն են, որոնք ինձ համար ամենահետաքրքիրն են կյանքում»,- խոստովանել է նա:
«Մի մոռացեք Ձեր կնոջը, դա թանկ կարժենա Ձեզ»,- ժպտալով նրան խորհուրդ է տվել Պուտինը։ «Ձեր կինը նույնպես հերոս է»,- հավելել է նա։
Վերադառնալով լուրջ տոնայնության՝ պետության ղեկավարը, դիմելով Սեմերիկովին, նշել է. «Ձեզ կարելի է միայն նախանձել, ինչպես նաև կարեկցել այն մարդկանց, որոնք կարոտով մտածում են, որ վաղն աշխատանքի են։ Բայց Դուք չեք ուզում աշխատանքից հեռանալ»։
«Այո, սա երջանկություն է, սա է երջանկությունը, երբ մարդն ապրում է այն գործով, որին նվիրել է իր կյանքը»,- հավելել է Կրեմլի ղեկավարը։
