Կառավարության օգոստոսի 6-ի նիստի օրակարգում չզեկուցվող հարցերից երկուսը վերաբերվում են Ասիական զարգացման բանկի և Վերակառուցման և զարգացման միջազգային բանկի հետ վարկային համաձայնագրերի հաստատմանը
Ըստ նախագծի հիմնավորման՝ Համաշխարհային բանկի հետ 2025 թվականի հոկտեմբերի 17-ին և 2026 թվականի փետրվարի 23-ին տեղի ունեցած բանակցությունների արդյունքում Հայաստանի Հանրապետության և Վերակառուցման և զարգացման միջազգային բանկի միջև 2026 թվականի հունիսի 3-ին և 8-ին ստորագրվել է 170,3 մլն եվրո արժողությամբ (200 մլն ԱՄՆ դոլարին համարժեք) «Հայաստանի տնտեսական վերափոխման զարգացման քաղաքականության վարկ» վարկային համաձայնագիրը, որը նպատակաուղղված է ՀՀ-ում մրցակցային միջավայրի բարելավմանը և ներդրումների ներգրավվմանը:
Համաշխարհային բանկի վարկի ժամկետը 28 տարի է՝ 10 տարի արտոնյալ ժամանակահատվածով, իսկ տարեկան լողացող տոկոսադրույքը կազմում է մոտ 3.93 տոկոս, ընդ որում առաջին վճարումը՝ 2036թ. հունիսի 15-ին, իսկ վերջինը՝ 2053թ. դեկտեմբերի 15-ին։
Համաձայնագրի շրջանակներում գումարը ներառված է «ՀՀ 2026թ. պետական բյուջեի մասին» օրենքում բյուջետային աջակցության վարկերի գծով դեֆիցիտի ֆինանսավորման աղբյուրներում, իսկ Համաձայնագրով սահմանված պայմաններով վարկի սպասարկման ծախսերը ներառված են ՀՀ 2026թ. պետական բյուջեի ծախսերում: Միաժամանակ, համաձայնագրում Հայաստանի Հանրապետության համար ֆինանսական պարտավորություններ նախատեսող՝ եկամուտների նվազեցման կամ ծախսերի ավելացման հանգեցնող դրույթներ առկա չեն:
Ըստ նախագծի հիմնավորման՝ վարկային միջոցներն ուղղվելու են տնտեսական վերափոխմանը, ներդրումների ու առևտրի ազատականացմանը, թվայնացմանը, ինչպես նաև՝ «կանաչ» տնտեսությանն անցնելուն և կլիմայական բարեփոխումներին։·
ՀՀ ֆինանսների նախարարությունը նախաձեռնել է Ասիական զարգացման բանկի (ԱԶԲ) միջոցներից 150 մլն դոլար բյուջետային աջակցության վարկի ներգրավման գործընթացը։
Համաձայնագրի նախագծով առաջարկվող վարկավորման պայմանները հետևյալն են՝ վարկի գումար` 150 մլն ԱՄՆ դոլար։ Վարկի լողացող տոկոսադրույքը կկազմի 4.58%, ժամկետը՝ 15 տարի, որից արտոնյալ ժամկետը` 3 տարի։
Ըստ նախագծի հիմնավորման՝ այս միջոցներով նախատեսվում է աջակցել հարկաբյուջետային կառավարմանն ու պետական պարտքի արդյունավետ հսկողությանը, ինչպես նաև զարգացնել պետական արժեթղթերն ու ֆինանսական շուկաները։
