Առնվազն 13 ռուս բարձրաստիճան զինվորական է ձերբակալվել «Վագների» խռովությունից հետո

Առնվազն 13 ռուս բարձրաստիճան զինվորական է ձերբակալվել հարցաքննության «Վագներ» մասնավոր ռազմական ընկերության հիմնադիր Եվգենի Պրիգոժինի ապստամբությունից հետո։ Այս մասին գրել է The Wall Street Journal-ը՝ հղում անելով աղբյուրներին:

Ըստ հրատարակության զրուցակիցների՝ Ռուսաստանի անվտանգության դաշնային ծառայությունը ձերբակալությունները սկսել է Պրիգոժինի ապստամբությունից մի քանի ժամ անց։

Աղբյուրներից մեկն ասել է, որ ձերբակալություններն արվում են «շարքերը մաքրելու» նպատակով։ 

Շուրջ 15 ռուս սպա արդեն հեռացվել ծառայությունից, կամ կասեցվել է նրանց գործունեությունը։

Համաձայն տեղեկատվության՝ ԱԴԾ-ի կողմից ձերբակալվածների թվում է ՌԴ օդատիեզերական ուժերի հրամանատար, Ուկրաինայում ռուսական զորքերի հրամանատարի տեղակալ, բանակի գեներալ Սերգեյ Սուրովիկինը։

Աղբյուրների խոսքով՝ գեներալը կալանքի տակ է Մոսկվայում, բայց ոչ քննչական մեկուսարանում, ապստամբության մասով բազմիցս հարցաքննվել է։

Լրատվամիջոցի զրուցակիցներից մեկն ասել է, որ Սուրովիկինը գիտեր ապստամբության պլանների մասին, սակայն չի մասնակցել դրան։ Սուրովիկինին մեղադրանք չի առաջադրվել։

Աղբյուրները նշել են, որ գեներալը գուցե ազատ արձակվի, հենց որ ՌԴ նախագահ Վլադիմիր Պուտինը որոշի, թե ինչպես արձագանքել ապստամբության հետևանքներին: 

Ինչպես գրել է The Wall Street Journal-ը, Պրիգոժինի ապստամբությունից հետո, մասնավորապես, բերման են ենթարկվել նաև Սուրովիկինի տեղակալ, գեներալ-գնդապետ Անդրեյ Յուդինը և ռազմական հետախուզության պետի տեղակալ գեներալ-լեյտենանտ Վլադիմիր Ալեքսեևը։

Հետո զինվորականներն ազատ են արձակվել, սակայն նրանց տեղաշարժը սահմանափակվել է, նրանք հսկողության տակ են։ Յուդինը և Ալեքսեևը հեռացվել են աշխատանքից։ Մյուս ձերբակալվածների թվում են գեներալ-գնդապետ Միխայիլ Միզինցևը, որը նախկինում զբաղեցրել է ՌԴ պաշտպանության փոխնախարարի պաշտոնը, ղեկավարել է Մարիուպոլի գրոհը լայնամասշտաբ պատերազմի սկզբում ու 2023 թվականի ապրիլից աշխատել է «Վագներում»:

Կրեմլն ու ՌԴ ՊՆ-ն չեն պատասխանել WSJ-ի լրագրողների՝ այս թեմայով մեկնաբանություն տալու խնդրանքին։